Starfsemin úr landi vegna hárra fyrirtækjaskatta
Skattar á fyrirtæki eru með hæsta móti í Svíþjóð. 80% sænsku þjóðarinnar telja líklegt að skattbyrðin leiði til þess að sænsk fyrirtæki flytji starfsemi sína úr landi. Þá telja 70% að háir skattar á fyrirtæki hamli gegn stofnun nýrra fyrirtækja og gegn fjölgun starfa á sænskum vinnumarkaði. Þetta er meðal niðurstaðna skoðana-könnunar sem unnin var af fyrirtækin Temo og greint er frá í skýrslu Samtaka atvinnulífsins í Svíþjóð um hagvöxt og skattbyrði fyrirtækja.
Eignarskattar draga úr hagvexti
Í skýrslunni er ennfremur greint frá rannsókn á samhengi hagvaxtar
og skattbyrði fyrirtækja og er sjónum einkum beint að
eignarsköttum. Rannsóknin var unnin af Hagfræðistofnun háskólans í
Lundi og eru skattkerfi og efnahagslíf tuttugu aðildarríkja OECD
borin saman. Greint er frá því að eignarskattar séu á hröðu
undanhaldi í aðildarríkjum OECD, en þeir séu þó enn innheimtir í
einhverri mynd í átta af þrjátíu aðildarríkjum stofnunarinnar, þar
á meðal í Svíþjóð og á Íslandi. Niðurstöður rannsóknarinnar eru á
þá leið að eignarskattar á fyrirtæki hafi neikvæð áhrif á hagvöxt
viðkomandi ríkja. Eignarskattar leggjast aftur og aftur á sömu
eignina, draga þannig úr vilja fyrirtækja og einstaklinga til að
fjárfesta í varanlegum eignum og eru því neysluhvetjandi.
Sjá nánar um könnunina og rannsóknina á vef Samtaka atvinnulífsins í Svíþjóð.
