Um okkur

Hér má sjá skipurit SA

Formaður Samtaka atvinnulífsins er kjörinn á aðalfundi samtakanna til tveggja ára í senn. Hann er jafnframt formaður stjórnar og framkvæmdastjórnar.

Formaður Samtaka atvinnulífsins 2025-2027 er Jón Ólafur Halldórsson.

Jón Ólafur Halldórsson er nýr formaður Samtaka atvinnulífsins. Tilkynnt var um kjörið á aðalfundi samtakanna í gær. Kosningaþátttaka var 73,1% og hlaut Jón Ólafur tæplega 98% atkvæða.

Jón Ólafur hefur starfað í þágu atvinnulífsins allt frá árinu 2015, þegar hann tók sæti í stjórn Samtaka atvinnulífsins. Hann hefur setið í framkvæmdastjórn samtakanna frá árinu 2018. Jón þekkir vel til þess að starfa sem formaður í Húsi atvinnulífsins, en hann sat í stjórn Samtaka verslunar og þjónustu frá árinu 2017 og var formaður SVÞ á árunum 2019 til 2025.

Jón Ólafur er véltæknifræðingur að mennt, en hefur jafnframt lokið MBA-námi frá Háskóla Íslands með áherslu á fjármál fyrirtækja. Einnig hefur hann lokið meistaraprófi (MS) í viðskiptafræði frá sama skóla, með áherslu á stefnumörkun og stjórnun fyrirtækja. Þá hefur hann lokið AMP-námi við IESE viðskiptaháskólann í Barcelona.

Jón Ólafur hefur unnið við stjórnunarstörf í íslensku atvinnulífi í um 30 ár. Hann starfaði hjá Olís í 27 ár, þar af sem forstjóri í sjö ár. Frá árinu 2021 hefur hann sinnt ýmsum ráðgjafa- og stjórnarstörfum.

Jón Ólafur er fæddur árið 1962. Hann er kvæntur Guðrúnu Atladóttur, innanhússarkitekt, og eiga þau saman þrjú börn og fimm barnabörn.

Stjórn SA er kosin árlega af fulltrúaráði. Hún er skipuð 20 mönnum auk formanns sem er formaður stjórnar. Varaformaður SA skal kjörinn úr hópi stjórnarmanna á fyrsta fundi nýrrar stjórnar eftir aðalfund.

Framkvæmdastjórn SA er skipuð formanni og varaformanni ásamt 6 mönnum sem stjórnin kýs úr hópi stjórnarmanna.

Stjórn SA mótar stefnu og megináherslur samtakanna, m.a. fyrir gerð almennra kjarasamninga. Stjórnin heldur fundi ársfjórðungslega eða oftar ef minnst tveir stjórnarmenn óska þess.

Framkvæmdastjórn SA skal kjörin á fyrsta stjórnarfundi eftir aðalfund. Framkvæmdastjórn SA er skipuð formanni og varaformanni ásamt 6 mönnum sem stjórnin kýs úr hópi stjórnarmanna. Framkvæmdastjóri situr framkvæmdastjórnarfundi.

Framkvæmdastjórn SA 2024-2025:

Eyjólfur Árni Rafnsson, formaður

Árni Sigurjónsson,

Benedikt Gíslason

Edda Rut Björnsdóttir

Guðmundur Kristjánsson

Jón Ólafur Halldórsson

Jónína Guðmundsdóttir

Pétur Óskarsson

Stjórn SA ræður framkvæmdastjóra samtakanna. Hann stjórnar skrifstofu samtakanna í samráði við framkvæmdastjórn, ræður til hennar starfsfólk og ber ábyrgð og hefur yfirumsjá með öllum daglegum framkvæmdum, s.s. innheimtu félagsgjalda, reikningshald, bréfaskriftir og undirbúning á afgreiðslu mála.

Framkvæmdastjóri, eða sá, sem hann setur í sinn stað, kemur fram fyrir hönd samtakanna gagnvart dómstólum landsins, hvort sem sambandið höfðar mál, eða mál er höfðað gegn þeim.

Stjórn SA er heimilt að fela framkvæmdastjóra að reka mál fyrir hönd samtakanna til viðurkenningar á tilteknum réttindum félagsmanna eða lausnar undan tilteknum skyldum þeirra, enda hafi úrlausn þýðingu fyrir aðildarfyrirtæki samtakanna. Sama á við um kvartanir og kærur til stjórnvalda.

Framkvæmdastjóra er heimilt að gera samninga um lögfræðiaðstoð og aðra þjónustu við einstök fyrirtæki og félög sem standa utan samtakanna.

Framkvæmdastjóri Samtaka atvinnulífsins er jafnframt framkvæmdastjóri vinnudeilusjóðs.

Sigríður Margrét Oddsdóttir er framkvæmdastjóri Samtaka atvinnulífsins.

Sigríður hefur starfað sem framkvæmdastjóri og forstjóri íslenskra fyrirtækja í tæp tuttugu ár. Sigríður hefur auk þess setið í stjórnum margra íslenskra fyrirtækja og hagsmunasamtaka. Sigríður er með B.Sc. gráðu í rekstrarfræðum frá Háskólanum á Akureyri og hefur einnig sótt stjórnendanámskeið hjá IESE Business School og Harvard.

Vinnudeilusjóður hefur það hlutverk að efla samstöðu aðildarfyrirtækja SA ef kemur til átaka á vinnumarkaði. Meginhlutverk sjóðsins er að styðja við stefnumörkun SA í kjaramálum með því að greiða bætur til aðildarfyrirtækja í kjaradeilum sem hafa verulega þýðingu fyrir heildarhagsmuni atvinnurekenda.

Aðildarfyrirtæki í þjónustudeild samtakanna, sbr. 5. gr., geta ekki átt aðild að sjóðnum.

Sjá nánar í samþykktum Samtaka atvinnulífsins

Stjórn

Stjórn vinnudeilusjóðs skipa þrír menn. Skulu þeir kjörnir til árs í senn á fyrsta fundi stjórnar SA eftir aðalfund. Framkvæmdastjóri samtakanna er jafnframt framkvæmdastjóri vinnudeilusjóðs.

Stjórn vinnudeilusjóðs stýrir fjárreiðum hans og ákveður greiðslu bóta til aðildarfyrirtækja í samræmi við ákvæði samþykkta þessara og reglna sem settar eru skv. þeim.

Samtök atvinnulífsins starfrækja réttarverndarsjóð sem hefur það hlutverk að standa straum af kostnaði vegna málareksturs og annarrar réttarvörslu í málum sem snerta hagsmuni atvinnulífsins eða margra félagsmanna.

Sjá nánar samþykktir SA

Stjórn réttarverndarsjóðs skipa þrír menn, tveir kosnir af framkvæmdastjórn SA til eins árs í senn og einn skipaður af framkvæmdastjóra SA.