1 MIN
Staðall um launajafnrétti kynntur 19. júní
Nýr staðall um jafnlaunakerfi verður kynntur á opnum morgunverðarfundi á Grand Hótel Reykjavík þriðjudaginn 19. júní kl. 8-10. Samtök atvinnulífsins, Alþýðusamband Íslands og velferðarráðuneytið hafa frá því í árslok 2008 unnið að gerð staðalsins. Um er að ræða brautryðjendastarf í jafnréttismálum sem á sér ekki fordæmi en fyrirmyndir voru sóttar í alþjóðlega staðla um t.d. gæða- og umhverfisstjórnun.
Nýr staðall um jafnlaunakerfi verður kynntur á opnum morgunverðarfundi á Grand Hótel Reykjavík þriðjudaginn 19. júní kl. 8-10. Samtök atvinnulífsins, Alþýðusamband Íslands og velferðarráðuneytið hafa frá því í árslok 2008 unnið að gerð staðalsins. Um er að ræða brautryðjendastarf í jafnréttismálum sem á sér ekki fordæmi en fyrirmyndir voru sóttar í alþjóðlega staðla um t.d. gæða- og umhverfisstjórnun.
Eins og aðrir staðlar verður hann valkvæður, þ.e. fyrirtækjum verður í sjálfsvald sett hvort þau innleiða hann. Með notkun staðalsins er fyrirtækjum auðveldað að koma á og viðhalda launajafnrétti kynja og geta þau fengið vottun þar um. Ávinningur fyrirtækis af notkun jafnlaunastaðalsins getur m.a. falist í bættri ímynd á grundvelli faglegrar mannauðsstjórnunar og áherslna á samfélagsábyrgð og góða stjórnarhætti.
Gerð staðalsins er í samræmi við bókun aðila vinnumarkaðarins við gerð kjarasamninga í febrúar 2008 og bráðabirgðaákvæði jafnréttislaga nr. 10/2008. Verkið hefur verið unnið á vettvangi Staðlaráðs Íslands með aðkomu fjölmargra aðila.
Frumvarp um jafnlaunastaðal er tilbúið til kynningar og fer nú í hefðbundið umsagnarferli sem lýkur 20. september næstkomandi. Öllum sem áhuga hafa er boðið að kynna sér staðalinn og senda inn umsagnir eða athugasemdir. Frumvarpið má nálgast hjá Staðlaráði gegn gjaldi, bæði á pappír og á rafrænu formi.
Kynningarfundurinn um jafnlaunastaðalinn þann 19. júní er öllum opinn og er ekkert þátttökugjald. Dagskrá fundarins er hér að neðan:
Ávörp flytja:
Jóhanna Sigurðardóttir forsætisráðherra
Gylfi Arnbjörnsson forseti ASÍ
Hannes G. Sigurðsson aðstoðarframkvæmdastjóri SA
Staðall um launajafnrétti:
Öguð vinnubrögð við stjórnun launamála: Hildur Jónsdóttir formaður tækninefndar um jafnlaunastaðal
Flokkun starfa: Birgir Björn Sigurjónsson hagfræðingur
Launagreiningar: Anna Borgþórsdóttir Olsen hagfræðingur
Íslenskur og evrópskur réttur á sviði launajafnréttis: Elsa S. Þorkelsdóttir lögfræðingur
Umsagnarferlið og úrvinnsla: Guðrún Rögnvaldardóttir framkvæmdastjóri Staðlaráðs
Guðbjartur Hannesson velferðarráðherra
Fyrirspurnir og umræður