Samningstíminn mikilvægur

Hannes G. Sigurðsson, aðstoðarframkvæmdastjóri SA, sagði í samtali við fréttastofu Útvarps í dag að verið sé að þróa hugmyndir um að samið verði til jafn langs tíma við öll landsambönd innan ASÍ en þau eru Starfsgreinasamband Íslands, Landsamband verslunarmanna, Samiðn, Rafiðnaðarsamband Íslands og Sjómannasambandið. Hugsanlega komi í ljós á fundum í dag hvort samstaða náist um samræmdan gildistíma kjarasamninga. Samtök atvinnulífsins hafa lagt áherslu á að samið verði til lengri tíma en skemmri, eða til allt að fjögurra ára til að tryggja stöðugleika.