Lengra skólaár ekki erfitt fyrir atvinnulífið
Í könnun Samtaka atvinnulífsins sem gerð var í júní voru fyrirtæki spurð um áhrif lengingar skólaársins á starfsmannahald þeirra. Spurningin var svohljóðandi: "Myndi lenging skólaársins um t.d. einn mánuð hafa veruleg áhrif á starfsmannahald fyrirtækisins?" Fjórðungur fyrirtækja játti því en þrír fjórðu sögðu svo ekki vera.
Helst vandi í ferðaþjónustunni
Ef horft er til einstakra greina kemur ekki á óvart að það er
einkum innan ferðaþjónustunnar (SAF) sem lenging skólaársins myndi
hafa áhrif, en um 56% fyrirtækja í ferðaþjónustu svöruðu
spurningunni játandi. Samkvæmt fyrri athugunum SA væri lenging
skólaársins í maí og júní þó miklum mun viðráðanlegri fyrir
ferðaþjónustuna en lenging þess í ágúst.
(smellið á myndina)
Þá svarar tæpur þriðjungur fjármálafyrirtækja (SFF) því játandi að lenging skólaársins myndi hafa veruleg áhrif á starfsmannahald sitt, sem og rúmur fjórðungur fyrirtækja í verslun og þjónustu (SVÞ). Í öðrum greinum yrðu áhrifin minni, minnst meðal rafverktaka (SART), þar sem 9% fyrirtækja svara spurningunni játandi.
Frekar áhrif á landsbyggðinni
Loks virðist sem lenging skólaársins myndi frekar hafa áhrif á
fyrirtæki á landsbyggðinni en á höfuðborgarsvæðinu. Rúm 30%
fyrirtækja með starfssvæði á landsbyggðinni svöruðu spurningunni
játandi, en tæp 22% fyrirtækja með starfssvæði á
höfuðborgarsvæðinu. Af fyrirtækjum með starfssvæði á landinu öllu
svöruðu tæp 23% spurningunni játandi.
Rúmlega þrettán hundruð aðildarfyrirtæki Samtaka atvinnulífsins
fengu spurningar í netpósti. Svör bárust frá tæpum sex hundruð, eða
rúmum 44%.
