Efnahagsmál - 

28. Nóvember 2011

Landsmenn borga reikninginn

Samtök atvinnulífsins

1 MIN

Landsmenn borga reikninginn

Ef tekið er mið af nýjustu þjóðhagsspá Seðlabankans þá verður landsframleiðsla Íslands 105 milljörðum króna lægri við árslok 2013 en hagspá Alþjóðagjaldeyrissjóðsins gerði ráð fyrir í nóvember árið 2008, samkvæmt útreikningum Samtaka atvinnulífsins (SA).

Ef tekið er mið af nýjustu þjóðhagsspá Seðlabankans þá verður landsframleiðsla Íslands 105 milljörðum króna lægri við árslok 2013 en hagspá Alþjóðagjaldeyrissjóðsins gerði ráð fyrir í nóvember árið 2008, samkvæmt útreikningum Samtaka atvinnulífsins (SA).

"Landsmenn eru að borga reikninginn fyrir þessa ríkisstjórn, sem nýtir ekki þau tækifæri sem eru til staðar," segir Vilhjálmur Egilsson, framkvæmdastjóri SA, í samtali við Morgunblaðið. Vilhjálmur bendir á að sú upphæð sem þjóðarbúið verður af, sökum minni hagvaxtar en spáð hafði verið, nemi á þriðja hundrað milljarða króna á árunum 2011- 2013.

Í umfjöllun Morgunblaðsins 23. nóvember segir m.a:

Í fyrstu hagspá AGS um horfur í íslensku efnahagslífi eftir hrun bankakerfisins haustið

2008 spáði sjóðurinn að umtalsverður hagvöxtur gæti hafist árið 2011 - og myndi mælast 13,8% á árunum 2011-2013. Hagspá Seðlabankans fyrr í þessum mánuði gerir hins vegar aðeins ráð fyrir 7,9% hagvexti á sama tímabili.

Hugmyndafræðileg andstaða

Vilhjálmur segir skort á fjárfestingum í hagkerfinu helstu ástæðu þess að hagvaxtarhorfur séu umtalsvert verri um þessar mundir en vonir höfðu staðið til fyrir þremur árum.

"Ríkisstjórnin virðist vera að gera sitt besta til að koma í veg fyrir að hægt sé að ráðast í fjárfestingar og framkvæmdir í atvinnulífinu. Hugmyndafræðileg andstaða innan ríkisstjórnarflokkanna gagnvart uppbyggingu í stóriðju og sú óvissa sem sjávarútvegurinn stendur frammi fyrir eru meginorsakir þess að efnahagsbati Íslands er jafn hægfara og raun ber vitni," að sögn Vilhjálms.

Samtök atvinnulífsins