Samtök atvinnulífsins hafa undirritað kjarasamning við 14 aðildarfélög BHM og tekur hann gildi 1. október nk. Samningurinn nær til félagsmanna í hlutaðeigandi stéttarfélögum sem starfa hjá aðildarfyrirtækjum SA og gegna störfum sem krefjast háskólamenntunar.

Félagsmenn í aðildarfélögum BHM hafa fram til þessa staðið utan aðalkjarasamninga sem SA hafa gert á vinnumarkaði. Aðrir kjarasamningar hafa ekki náð til þessa hóps enda aðildarfyrirtæki Samtaka atvinnulífsins óbundin af þeim kjarasamningum sem BHM-félög gera við aðra viðsemjendur. Að mati SA er eðlilegt að tryggja launamönnum sem starfa á almennum vinnumarkaði og eru félagsmenn í stéttarfélögum innan BHM sambærileg réttindi og launamenn í öðrum stéttarfélögum á almennum vinnumarkaði njóta.

Háskólamenn og vinnuveitendur hafa skv. nýja kjarasamningnum mikið svigrúm til að semja um kaup og kjör og fyrirkomulag vinnutíma og greiðslna í tengslum við hann. Ýmis ákvæði kjarasamningsins gilda því einungis ef ekki er um annað samið í ráðningarsamningi.

Eftirtalin félög eiga aðild að samningnum:

Félag íslenskra félagsvísindamanna,

Félag íslenskra hjúkrunarfræðinga,

Félag íslenskra náttúrufræðinga,

Félag lífeindafræðinga,

Fræðagarður,

Iðjuþjálfafélag Íslands,

Kjarafélag viðskiptafræðinga og hagfræðinga,

Ljósmæðrafélag Íslands,

Sálfræðingafélag Íslands,

Stéttarfélag bókasafns- og upplýsingafræðinga,

Stéttarfélag háskólamenntaðra á matvæla- og næringarsviði,

Stéttarfélag lögfræðinga,

Stéttarfélag sjúkraþjálfara,

Þroskaþjálfafélag Íslands.

Kynningarfundur vegna nýja kjarasamningsins verður haldinn í Húsi atvinnulífsins, Borgartúni 35 - 6. hæð þriðjudaginn 16. september og hefst hann kl. 9.

Vinsamlegast skráið þátttöku með því að smella hér

Sjá nánar samninginn (PDF)