Vinnumarkaður - 

13. mars 2001

Hver á að kosta vinnustaðakennslu?

Samtök atvinnulífsins

1 MIN

Hver á að kosta vinnustaðakennslu?

Mörg fyrirtæki bera mikinn kostnað af vinnustaðanámi en önnur taka ekki nema, og skekkir þetta samkeppnisstöðuna. Í greinargerð starfshóps Samtaka iðnaðarins, sem unnin er í samvinnu við Samtök ferðaþjónustunnar, er fjallað um hvort jafna þurfi þennan mun og þá hvernig.

Mörg fyrirtæki bera mikinn kostnað af vinnustaðanámi en önnur taka ekki nema, og skekkir þetta samkeppnisstöðuna. Í greinargerð starfshóps Samtaka iðnaðarins, sem unnin er í samvinnu við Samtök ferðaþjónustunnar, er fjallað um hvort jafna þurfi þennan mun og þá hvernig.

 

Fjárhagsleg ábyrgð á vinnustaðakennslu er heiti greinargerðar starfshópsins. Þar er fjallað um þann vanda sem fólginn er í skekktri samkeppnisstöðu fyrirtækja sem bera mikinn kostnað af vinnustaðanámi á meðan önnur taka ekki nema. Gerð var könnun meðal 49 fyrirtækja í iðnaði og veitingaþjónustu þar sem 28 fyrirtæki svöruðu. Í niðurstöðum könnunarinnar kemur fram vilji fyrirtækja til að jafna fjárhagslega ábyrgð á vinnustaðakennslu. Jafnframt kemur fram áhersla á að stjórnvöld beri fjárhagslega ábyrgð á vinnustaðanámi með sama hætti og þau bera ábyrgð á skólanámi, en í framhaldsskólalögunum kemur fram að vinnustaðanám sé hluti iðnnáms. Telur starfshópurinn rétt að atvinnurekendur leiti samninga við stjórnvöld um að taka þátt í fjármögnun vinnustaðakennslu.

Starfshópurinn ræddi hvernig jafna mætti fjárhagslega ábyrgð stjórnvalda og fyrirtækja á vinnustaðakennslu. Fjórar leiðir eru taldar koma til greina við fyrirkomulag greiðslu til fyrirtækja vegna vinnustaðanáms og telur starfshópurinn raunhæfustu leiðina fólgna í því að útgjöld vegna vinnustaðanáms verði á fjárlögum. Aðrar leiðir sem koma þykja til greina eru þær að starfsþjálfunargjald sé tekið af tryggingagjaldi, að stofnaður verði starfsþjálfunarsjóður ("Nemasjóður") eða að fyrirtæki sem taki nema í vinnustaðaþjálfun geti sótt um skattaívilnun sem nemi launakostnaði iðnnema, í heild eða að tilteknu hlutfalli. Greinargerðina, sem kynnt hefur verið framkvæmdastjórum aðildarfélaga Samtaka atvinnulífsins, er að finna á heimasíðu Samtaka iðnaðarins.

Samtök atvinnulífsins