Fiskur og stækkun ESB: ekki sömu lausn og síðast
Ráðgjafarnefnd Evrópska efnahagssvæðisins hefur samþykkt ályktun um stækkun ESB og framtíð EES-samningsins, þar sem áhersla er lögð á mikilvægi þess að stækkun EES fari fram samtímis stækkun ESB og á nauðsyn þess að án tafar verði fundin lausn á spurningum um framkvæmd stækkunar EES. Nefndin leggur í ályktuninni áherslu á að stækkun ESB og EES muni verða jákvæð þróun fyrir álfuna alla og skapa ný tækifæri jafnt fyrir fyrirtæki og neytendur. Þá hvetur nefndin ríkisstjórnir EES EFTA-ríkjanna til að efla samskipti sín við væntanleg aðildarríki ESB.
Samstaða um ásættanlega lausn á
fiskútflutningi
Í ályktun sinni fjallar nefndin jafnframt um áhrif stækkunar ESB á
fiskútflutning EFTA-ríkjanna til núverandi umsóknarríkja.
EFTA-ríkin hafa samið um nær algera fríverslun með fisk við umrædd
ríki en við aðild þeirra að ESB falla fríverslunarsamningarnir úr
gildi. Við síðustu stækkun ESB fengu Ísland og Noregur
viðbótarkvóta án tolla til sambandsins, byggðan á útflutningi
síðustu þriggja ára til viðkomandi ríkja. EFTA-ríkin hafa ítrekað
bent á að þar sem um mjög vaxandi markaði er að ræða í
umsóknarríkjunum væri sambærileg lausn ekki sanngjörn að þessu
sinni og hafa þau í staðinn viljað semja um almennar lækkanir eða
afnám tolla til ESB. Í ályktun sinni hvetur ráðgjafarnefnd EES alla
aðila til að leggja sitt af mörkum til að finna ásættanlega lausn á
þessu máli. Nefndin segist þeirrar skoðunar að finna verði lausn
þar sem horft sé fram á við, fremur en að einfaldlega sé byggt á
útreikningum á viðskiptum síðustu ára.
Ráðgjafarnefnd EES samanstendur af ráðgjafarnefnd EFTA annars vegar
og fulltrúum efnahags- og félagsmálanefndar ESB (European Economic
and Social Committee) hins vegar, þ.e. fulltrúum aðila
vinnumarkaðar og fleiri hagsmunasamtaka í löndum Evrópska
efnahagssvæðisins.
