Forsvarsmenn Evrópusamtaka atvinnulífsins, BusinessEurope, komu saman í Kaupmannahöfn í dag, en fundurinn var haldinn í samstarfi við dönsku samtökin DA (Dansk Arbejdsgiverforening) og DI (Dansk Industri). Jón Ólafur Halldórsson, formaður SA, Sigríður Margrét Oddsdóttir, framkvæmdastjóri, og Heiðrún Björk Gísladóttir, alþjóðafulltrúi, voru á fundinum fyrir hönd Samtaka atvinnulífsins.

„Fundurinn undirstrikar sameiginlega ábyrgð okkar í Evrópu,“ segir Jón Ólafur. „Við hjá SA styðjum kröftugar aðgerðir til að efla samkeppnishæfni, draga úr flækjustigi og skapa tækifæri fyrir græn og sjálfbær umskipti í atvinnulífinu.“

Ástæða fundarins er að Danmörk tekur við formennsku í ráðherraráði ESB í byrjun júlí. Á fundinum voru lykiláherslur evrópsks atvinnulífs lagðar fyrir Morten Bødskov, iðnaðar-, viðskipta- og fjármálaráðherra Dana, auk þess sem þátttakendur funduðu með Dan Jørgensen, framkvæmdastjóra orku- og húsnæðismála hjá ESB. Þá tóku konungshjónin Friðrik tíundi og Mary drottning á móti fulltrúum fundarins.

Evrópa stendur frammi fyrir sögulegum áskorunum

Fredrik Persson, forseti BusinessEurope, undirstrikaði að sterkt atvinnulíf og samkeppnishæft efnahagsumhverfi væri forsenda þess að Evrópa geti tekist á við þær áskoranir sem steðja að á sviði alþjóðamála og samfélagsmála.

„ESB verður að hrinda í framkvæmd nýrri stefnu um innri markaðinn, grípa til frekari aðgerða til að lækka orkukostnað og einfalda regluverk á raunhæfan hátt,“ sagði Persson. „Við verðum að ráðast að rótum samkeppnishallans og efla alþjóðaviðskipti – ekki síst með skjótri staðfestingu á viðskiptasamningum við Mercosur [Mercado Común del Sur, tollabandalag ríkja í Suður-Ameríku] og Mexíkó. Um leið verður ESB að gæta hagsmuna sinna gagnvart Bandaríkjunum til að koma í veg fyrir skaðlegar tolladeilur. Nýlegur leiðtogafundur ESB og Bretlands gefur von um styrkara samstarf og efnahagslega velferð.“

Persson bætti við að BusinessEurope treysti því að komandi formennska Dana í ráðherraráði ESB stuðlaði að nauðsynlegri samstöðu til að bregðast við þeim sögulegu áskorunum sem Evrópa stendur frammi fyrir.

Áhersla á samráð og samkeppnishæfni

Jacob Holbraad, framkvæmdastjóri DA, sagði að aukin samkeppnishæfni byggðist á menntuðu starfsfólki, minna íþyngjandi regluverki og virðingu fyrir vinnumarkaðslíkönum þjóða.

„Það gleður okkur að Danir hyggist á formennskutíð sinni setja félagslegan samráðsvettvang í forgang – ekki aðeins í orði, heldur sem raunverulegt tæki til atvinnusköpunar, stöðugleika og sjálfbærs vaxtar,“ sagði Holbraad.

„Evrópskt atvinnulíf stendur sameinað og tilbúið til að leiða þessar umbreytingar“

Lars Sandahl Sørensen, forstjóri DI, lagði áherslu á að Evrópa stæði frammi fyrir alvarlegri kreppu.

„Við getum ekki lengur tekið efnahagslegri velferð og samkeppnishæfni sem gefnum hlut,“ sagði Sørensen. „En í mótlæti felast einnig tækifæri – við verðum að brjóta niður hindranir innan Evrópu, draga úr skriffinnsku og fjárfesta kröftuglega í varnarmálum, nýsköpun og grænum umskiptum. Eftir að hafa hitt kollega mína víðsvegar að úr Evrópu hér í Kaupmannahöfn, er ég sannfærður um að evrópskt atvinnulíf stendur sameinað og tilbúið til að leiða þessar umbreytingar.“

Hér er hægt að lesa yfirlýsingu fundarins í heild sinni í svokallaðri Kaupmannahafnaryfirlýsingu frá fundi formanna aðildarsamtaka BusinessEurope.