Vísitala neysluverðs miðuð við verðlag í októberbyrjun 2002 var 224,1 stig og hækkaði um 0,54% frá fyrra mánuði. Vísitala neysluverðs án húsnæðis var 222,4 stig og hækkaði um 0,59% frá fyrra mánuði. Í frétt frá Hagstofu Íslands kemur fram að sumarútsölum er nú lokið og hækkaði verð á fötum og skóm um 4,9% (vísitöluáhrif 0,27%).

Útlit fyrir að verðbólgumarkmið Seðlabankans náist
Í samtali við Morgunblaðið segir Hannes G. Sigurðsson, aðstoðarframkvæmdastjóri Samtaka atvinnulífsins, að hækkunin nú komi ekki á óvart þar sem vitað var að útsölulok á fatnaði og skóm myndu hafa veruleg áhrif á vísitöluna nú. "Þessi hækkun breytir því ekki að útlit er fyrir að verðbólgumarkmið Seðlabankans fyrir árið í ár náist, það er verðbólgan verði undir 2,5% í árslok. Í nóvember og desember í fyrra hækkaði vísitalan um 0,4 og 0,5% en það er fráleitt að hækkunin verði svo mikil í ár. Áður en verðbólgukúrfan tók að rísa fyrir þremur árum var yfirleitt óbreytt eða lækkandi verðlag í þessum mánuðum vegna tilboða í kringum jólin."

Hægir á hækkun húsnæðisliðar
Að sögn Hannesar er athyglisvert að sjá að það er að hægja á hækkun á húsnæðisliðnum sem stendur nú að baki helmingi hækkunar vísitölunnar á árinu. "Ef við lítum á vísitölu neysluverðs án húsnæðis þá er hún nú 0,6% hærri en í ársbyrjun samanborið við 1,2% hækkun vísitölunnar í heild." Hannes segir að breytingar hinna ýmsu þjónustuliða séu til vitnis um að hér ríkir stöðugt verðlag. "Verð hækkar og lækkar á víxl á markaðnum og því ríkir ekki verðbólguástand lengur á Íslandi," segir Hannes.