Umhverfisdagur atvinnulífsins

Umhverfisdagur atvinnulífsins 2025

Umhverfisdagur atvinnulífsins 2025 fór fram í tíunda sinn mánudaginn 24. nóvember 2025 á Hilton Reykjavík Nordica kl. 09:00 - 11:30 undir yfirskriftinni Frá yfirlýsingum til árangurs.

Á Umhverfisdegi atvinnulífsins 2025 var kastljósinu beint að gagnsæi, trúverðugleika og samkeppnishæfni í loftslags- og umhverfismálum. Í kraftmikilli dagskrá leiddi áhrifafólk í atvinnulífi, stjórnmálum og stjórnsýslu saman hesta sína. Að lokum voru Umhverfisverðlaun atvinnulífsins 2025 veitt umhverfisfyrirtæki ársins 2025, Heimum og umhverfisframtaki ársins 2025, SnerpaPower. Sérstakar viðurkenningar hlutu JÁVERK og Krónan.

Umhverfisdagur atvinnulífsins er haldinn ár hvert til þess að fagna árangri og miðla fjölbreyttri reynslu fyrirtækja í umhverfismálum á Íslandi. Dagskráin er sameiginlegt verkefni Samtaka atvinnulífsins og allra aðildarsamtaka: SA, SAF, SFF, SFS, SI og Samorku.

Á dagskrá var þetta helst

Gagnsæi, trúverðugleiki og samkeppnishæfni í loftslags- og umhverfismálum.

Dagurinn í ár var byggður upp af tveimur lotum. Fyrri lotan tók á gagnsæi sem forsendu trúverðugleika. Síðari lotan fjallaði um samkeppnishæfni Íslands í ljósi umhverfisstefnu ESB.

Hvatning til fyrirtækja

Umhverfisverðlaun atvinnulífsins

Verðlaunin eru veitt fyrirtækjum sem skara fram úr í umhverfis- og loftslagsmálum og sýna í verki hvernig árangur næst með markvissum aðgerðum, nýsköpun og ábyrgri stjórnun.

Umhverfisfyrirtæki ársins 2025 er Heimar.

Úr umsögn dómnefndar:

„Heimar er íslenskt fasteignafélag sem fjárfestir í, leigir út og annast rekstur á atvinnuhúsnæði. Félagið hefur tekið afgerandi skref í átt að umhverfislega ábyrgri starfsemi og hefur forgangsraðað í þágu árangurs í umhverfismálum og sjálfbærni, hvort sem heldur er horft til ákvarðana í rekstri, fjárfestingum eða fjárfestingarákvörðunum.

Heimar hafa innleitt umhverfisstjórnunarkerfi sem tryggir að umhverfissjónarmið séu samþætt allri starfsemi félagsins. Með skýrri sýn, mælanlegum markmiðum og stöðugum umbótum hafa Heimar náð eftirtektarverðum árangri sem sést í fjölgun umhverfisvottaðra eigna, grænni fjármögnun, stýringu og vöktun orkunotkunar og minnkandi kolefnisspori. Heimar eru þannig ekki aðeins að fylgja þróuninni heldur að stýra henni með gagnsæi, ábyrgð og metnaði til að ganga lengra en lög og reglur segja til um.“

Umhverfisframtak ársins 2025 hlýtur SnerpaPower

Úr umsöng dómnefndar:

”SnerpaPower ehf. er tæknifyrirtæki á sviði raforkumarkaðar sem hefur þróað frá grunni hugbúnaðarlausn sem gerir stórnotendum raforku, eins og til dæmis álverum og gagnaverum, kleift að nýta lifandi gagnastrauma til að besta og sjálfvirknivæða skammtíma ákvarðanatöku tengdri raforkunotkun og þátttöku á markaði auk þess að uppfylla skyldur um skil á áætlunum og pöntunum rafmagns.

SnerpaPower hefur á örfáum árum umbreytt því hvernig orkusækinn iðnaður nýtir raforku á Íslandi og er fyrirtækið nú að sækja á erlenda markaði. Hugbúnaður SnerpaPower byggir á nýjustu aðferðum í gagnavísindum, gervigreind og vélnámi og styður stórnotendur í að nýta endurnýjanlega orkugjafa á skilvirkari hátt, lækka raforkukostnað og bæta samkeppnishæfni sína á alþjóðamörkuðum. Lausnin eykur nýtni raforkukerfisins alls og skilar umframorku og –afli til samfélagsins sem nýtist beint í orkuskiptin.“