Menntadagur atvinnulífsins 2026
Framtíðin kallar. Er menntakerfið að hlusta?
Menntaverðlaun atvinnulífsins voru veitt við hátíðlega athöfn á Menntadegi atvinnulífsins á Hilton Reykjavík Nordica þann 11. febrúar síðastliðinn.
Yfirskrift dagsins var Framtíðin kallar. Er menntakerfið að hlusta? og var sjónum sérstaklega beint að samspili og samvinnu atvinnulífs og skóla.
Menntadagur atvinnulífsins er sameiginlegt verkefni SA, SI, SVÞ, SAF, SFS, SFF og Samorku.
Menntaverðlaun atvinnulífsins
BM Vallá og Atlas Primer verðlaunuð
BM Vallá er Menntafyrirtæki ársins 2026.
Í umsögn dómnefndar segir: „Val dómnefndar á BM Vallá byggir á því að fræðsla sé ekki jaðarverkefni heldur órjúfanlegur hluti af erfðamengi fyrirtækisins, bæði í rekstri og mannauðsmálum. Frá árinu 2020 hefur fyrirtækið lyft grettistaki í fræðslumálum innan byggingariðnaðarins og markvisst umbreytt menningu, viðhorfum og sjálfstrausti starfsfólks. Hjá BM Vallá starfar fjölþjóðlegur hópur fólks og hefur fyrirtækinu tekist að tryggja raunverulegt aðgengi allra að fræðslu með inngildandi nálgun, fræðslu á vinnutíma og lausnum sem taka mið af raunverulegum aðstæðum íslensks vinnumarkaðar. Með ástríðu, metnaði og mælanlegum árangri sýnir BM Vallá í verki hvernig fræðsla getur eflt einstaklinga, styrkt fyrirtæki og haft jákvæð áhrif á samfélagið í heild.“
Þrjú fyrirtæki fengu tilnefningu í flokki Menntafyrirtækis ársins en auk BM Vallár voru Krónan og AÞ-Þrif tilnefnd.
Atlas Primer Menntasproti atvinnulífsins 2026
Í umsögn dómnefndar segir: „Atlas Primer sameinar tæknilega forystu, samfélagslega ábyrgð og alþjóðlegan metnað í hágæða stafrænni fræðslu. Með nýstárlegri samtalsgervigreind getur menntatæknifyrirtækið umbreytt því hvernig fræðsla og starfsþróun fara fram, gert nám aðgengilegra, mannvænna og skilvirkara fyrir ólíka hópa og jafnað aðstöðumun þeirra sem eiga undir högg að sækja í hefðbundnu fræðsluumhverfi. Atlas Primer sýnir að fjárfesting í stafrænni fræðslu er lykilforsenda samkeppnishæfni á tímum örra breytinga og hefur með alþjóðlegum árangri sínum skapað raunveruleg verðmæti bæði hér heima og erlendis. Með þessari vegferð er Atlas Primer fyrirmynd íslenskra sprotafyrirtækja og sannfærandi dæmi um það hvernig íslensk menntatækni getur haft víðtæk áhrif, eflt mannauð og lagt grunn að sjálfbærri framtíð.“
Samtök ferðaþjónustunnar
Samtök orku- og veitufyrirtækja
Samtök fyrirtækja í fjármálaþjónustu
Samtök fyrirtækja í sjávarútvegi
Samtök iðnaðarins
Samtök verslunar og þjónustu
Starfsmenntasjóðir leggja deginum lið
Starfsmenntasjóðir hafa aukið starfshæfni og menntunarstig starfsfólks á almennum vinnumarkaði og bætt samkeppnishæfni fyrirtækja.
Landsmennt, Starfsafl, Starfsmenntasjóður verslunar og skrifstofufólks og Starfsmenntasjóður STF lögðu Menntadegi atvinnulífsins lið.