Tómas Ingi Olrich, menntamálaráðherra, hefur lagt fram skýrslu verkefnisstjórnar þar sem metin eru áhrif styttingar námstíma til stúdentsprófs eru metin og nokkrum hugmyndum um mögulega útfærslu styttingar varpað fram. Í skýrslunni er lagt til að námstími til stúdentsprófs á framhaldsskólastigi verði styttur um eitt ár. Til að mæta auknu kennsluálagi innan skólaársins yrði kennsludögum fjölgað um tíu skv. þeim tillögum sem koma fram í skýrslunni. Sjá nánar á heimasíðu menntamálaráðuneytisins.

Stefna Samtaka atvinnulífsins
Samtök atvinnulífsins fagna því að hreyfing sé að komast á þetta mál, sem verið hefur eitt helsta stefnumál samtakanna í menntamálum. Samtökin hafa ítrekað bent á það þjóðhagslega hagræði sem í slíkri breytingu væri fólgið og jafnframt hafa SA bent á að hagsmunir atvinnulífsins af sumarvinnu skólafólks standa ekki í vegi fyrir lengingu skólaársins í þessu skyni, sé það gert fyrri hluta sumars. Stefna SA hefur raunar verið sú að jafnframt bæri að fækka árum í grunnskóla um eitt og stytta þannig námstíma til stúdentsprófs um alls tvö ár, en samtökin fagna vissulega hverjum áfanga á þeirri leið.

Sjá skýrsluna Bætum lífskjörin!, frá apríl 2003.

Sjá menntakaflann í Áherslum atvinnulífsins, frá maí 2001.