8% kaupmáttaraukning á samningstímanum
Kaupmáttur launa hefur vaxið mikið undanfarin ár eins og kunnugt er. Kaupmáttaraukningin hefur haldið áfram á yfirstandandi samningstímabili þrátt fyrir að verðbólga hafi aukist tímabundið, einkum vegna gengislækkunar krónunnar. En hver hefur kaupmáttarþróunin verið á samningstímanum á almennum vinnumarkaði? Meginhluti kjarasamninga rann út um miðjan febrúar árið 2000 og var endurnýjaður á næstu mánuðum á eftir og því eðlilegt að miða upphaf samningtímabilsins við 1. ársfjórðung ársins 2000.
Nú liggja mælingar Kjararannsóknarnefndar (KRN) fyrir á launum á 2. ársfjórðungi 2001. Þær sýna að laun hafi hækkað að meðaltali um 9,6% á einu ári. Á 1. ársfjórðungi þessa árs mældist 13,7% launahækkun frá 1. ársfj. 2000.
Í meðfylgjandi línuriti eru hækkanir launa og aukning kaupmáttar skv. mælingum KRN tengdar saman í vísitölur sem hefjast á 4. ársfj. 1997. Tímabilið miðast við þann tíma sem KRN hefur birt niðurstöður sínar með núverandi sniði. Línuritið sýnir að frá 4. ársfj. 1997 hafa laun á almennum vinnumarkaði hækkað um 28,5% og kaupmáttur þeirra um 12%. Á yfirstandandi samningstímabili, þ.e. frá 1. ársfj. 2000 til 2. ársfj. 2001 hafa laun hækkað að jafnaði um 15% og kaupmáttur þeirra um 8%.
