Fyrirtæki hyggjast draga úr fjárfestingum

Samkvæmt könnun Samtaka atvinnulífsins verður samdráttur í fjárfestingum fyrirtækja á árinu. Nálægt helmingi fyrirtækja hyggst draga úr fjárfestingum sínum árið 2001 samanborið við árið 2000, eða 44% þeirra er svöruðu könnuninni. Tæpur fjórðungur fyrirtækja hyggst auka fjárfestingar sínar á árinu en tæpur þriðjungur þeirra gerir ráð fyrir að fjárfesta álíka mikið og á liðnu ári. Samdrátturinn virðist vera mestur í útgerð.
Sjá nánar

Laun hækka mest á Íslandi
Samanburður á launaþróun leiðir í ljós að laun landverkafólks hér á landi hækkuðu mun meira en í samanburðarlöndum, frá 3. ársfjórðungi 1999 til 3. ársfjórðungs 2000. Hér hækkuðu launin um 8,3% á sama tíma og þau hækkuðu t.d. um 3,5-5% á hinum Norðurlöndunum
Sjá nánar

Nýir kjarasamningar
Í janúarmánuði voru undirritaðir kjarasamningar við nokkur félög, m.a. við Rafiðnaðarsambandið vegna starfsmanna hjá Landssímanum. Einnig var gerður nýr heildarsamningur við Starfsgreinasamband Íslands vegna hópbifreiðastjóra. Enn er ólokið samningum við marga hópa, s.s. fiskimenn, blaðamenn og starfsmenn ISAL og Járnblendifélagsins, en viðræðum miðar vel við flesta hópa.

Ný kaupgjaldsskrá Samtaka atvinnulífsins
Kaupgjaldsskrá SA er komin á vefinn. Hér er um að ræða launataxta verkafólks, verslunarmanna og iðnaðarmanna. Laun hækkuðu um áramótin almennt um 3,0% en kauptaxtar taka þó meiri hækkun. Skráin er birt á vefnum á pdf-sniði. Pappírsútgáfan er send öllum aðildarfyrirtækjum SA
Sjá nánar

"Á döfinni" á fréttavef Samtaka atvinnulífsins er samantekt um fundi og ráðstefnur framundan, sem tengjast atvinnulífinu og starfsumhverfi fyrirtækja. Lesendur fréttabréfsins eru eindregið hvattir til að senda upplýsingar um fundi eða ráðstefnur framundan á netfangið sa@sa.is.
Sjá nánar: Á döfinni

Umhverfisstjórnunarkerfi fyrir lítil og meðalstór fyrirtæki
Undirritaður hefur verið samstarfssamningur SA við umhverfisráðuneytið, Iðntæknistofnun og fyrirtækið Landmat ehf. um þróun umhverfisstjórnunarkerfis á Internetinu. Kerfinu er ætlað að auðvelda litlum og meðalstórum fyrirtækjum að stilla upp grænu bókhaldi fyrir starfsemi sína og marka sér umhverfisstefnu án óviðráðanlegs kostnaðar.
Sjá nánar

Eðlilegt að EES fái minni athygli, segir Patten
Chris Patten, sem fer með utanríkismál í framkvæmdastjórn Evrópusambandsins, sagði í ræðu sinni á aðalfundi Samtaka atvinnulífsins í Noregi (NHO) að eðlilegt væri að EES-samningurinn fengi minni athygli hjá ESB þegar ESB-ríkin yrðu orðin 27, með 480 milljónir íbúa, en EFTA-ríkin þrjú, með 4,8 milljónir íbúa.
Sjá nánar

Gagnagrunnur um útboð á Evrópska efnahagssvæðinu
Sænska fyrirtækið Euro Business Link hefur sett á fót gagnagrunn á Netinu um útboð og viðskiptatilboð á Evrópska efnahagssvæðinu. Sem kunnugt er eru opinberir aðilar á Evrópska efnahagssvæðinu skyldugir að bjóða út verkefni yfir tiltekinni upphæð á öllu svæðinu.
Sjá nánar

Samráð um markaðsvænar lausnir í umhverfismálum
Finnur Geirsson, formaður SA, lagði í ávarpi sínu á umhverfisþingi megináherslu á mikilvægi virks samráðs við atvinnurekendur um þróun markaðsvænna lausna í umhverfismálum, þar sem atvinnurekendum er gefinn kostur á að koma með frumkvæði að útfærslunni og hugsanleg gjaldtaka einskorðast við raunverulegan kostnað af förgun eða endurnýtingu viðkomandi úrgangs. "Forðast ber þunglamalegt eftirlit hins opinbera en treysta þeim mun meira á sjálfsmat og innra eftirlit fyrirtækja" sagði Finnur.
Sjá nánar

Nýr forstöðumaður stefnumótunar- og samskiptasviðs
Gústaf Adolf Skúlason hefur verið ráðinn forstöðumaður stefnumótunar- og samskiptasviðs hjá Samtökum atvinnulífsins. Hann tekur við starfinu um nk. mánaðamót af Ólafi Þ. Stephensen sem hefur verið ráðinn aðstoðarritstjóri Morgunblaðsins
Sjá nánari upplýsingar um Gústaf

Davíð Stefánsson til Vefur.is
Davíð Stefánsson stjórnsýslufræðingur lét af störfum hjá Samtökum atvinnulífsins í janúarlok og tók við starfi framkvæmdastjóra hjá tölvu- og upplýsingafyrirtækinu Vef.is. Davíð hefur starfað hjá Samtökum atvinnulífsins frá stofnun þeirra árið 1999 og áður hjá Vinnuveitendasambandi Íslands frá árinu 1997. Hjá Samtökum atvinnulífsins hefur Davíð m.a. starfað að Evrópu-, mennta-, vef-, útgáfu- og kynningarmálum. Samtök atvinnulífsins þakka Davíð fyrir vel unnin störf og óska honum velfarnaðar í nýju starfi.