1. tbl. 2001
Hægt er að lesa fréttabréfið í heild á vef SA. Ef póstforritið þitt les ekki html-póst getur þú breytt áskrift þinni hér.

Ríkisútgjöld hækka um 10% á ári 1998 til 2001

Skatttekjur ríkissjóðs hafa rokið upp í góðærinu undanfarin ár - enn meira en tekjur landsmanna. Á tveim síðustu árum nýliðinnar aldar, frá 1998 til 2000, hækkuðu skattarnir um 27,5%. Myndarlegur afgangur af ríkissjóði dregur úr þenslu, en um leið minnkar aðhald að ríkisútgjöldum. Þau hafa vaxið hröðum skrefum undanfarin ár og aukið á umsvif í hagkerfinu. Frá fjárlögum 1998 til 2001 hafa ríkisútgjöld vaxið um 10% á ári.
Sjá nánar

Aukin vinna og nýjar skyldur vegna persónuverndarlaga
Um áramótin tóku gildi ný lög um persónuvernd og skráningu og meðferð persónulegra upplýsinga. Með lögunum eru nýjar skyldur og ábyrgð lögð á fyrirtæki og ætla má að þau hafi í för með sér aukna vinnu fyrir mörg fyrirtæki.
Sjá nánar

Bjarnargreiði við neytendur
Hlutverk Samkeppnisstofnunar er ekki að stýra uppbyggingu íslensks atvinnulífs, heldur að beita sér gegn ólögmætu atferli. Það sem skiptir mestu máli er að bregðast við misnotkun á markaðsráðandi stöðu en ekki að banna markaðsráðandi stöðu í sjálfri sér, skrifar Ari Edwald, framkvæmdastjóri SA. Það hlýtur að vera algert neyðarúrræði að banna samruna fyrirtækja. Því miður virðist veruleg hætta á að óbreyttar áherslur Samkeppnisstofnunar verði fyrst og fremst ósigur fyrir
framleiðniþróun og bætt lífskjör á Íslandi.
Sjá nánar

Ný lög um hópuppsagnir gera auknar kröfur til samráðs við trúnaðarmenn

Fyrirtæki sem áformar hópuppsagnir er skylt að hafa samráð við trúnaðarmann starfsmanna svo fljótt sem auðið er, samkvæmt nýjum lögum. Fyrirhugaðar hópuppsagnir skal einnig tilkynna til vinnumiðlunar en uppsögn getur fyrst tekið gildi mánuði eftir tilkynningu. Brot gegn reglum laganna um samráð og tilkynningar geta varðað sektum.
Sjá nánar

Nýir kjarasamningar
Af þeim 23 samningum, sem losnuðu á síðustu mánuðum ársins 2000, eru 15 enn lausir. Á síðustu vikum ársins 2000 var m.a. samið við Verkstjórasamband Íslands, rafiðnaðarmenn hjá RARIK, vélstjóra í landi og tannsmiði. Allir þessir samningar eru birtir á kjaravef SA. Viðræður eru í gangi við ýmsa aðra hópa og eru þær mislangt á veg komnar.
Sjá nánar

"Á döfinni" á fréttavef Samtaka atvinnulífsins er samantekt um fundi og ráðstefnur framundan, sem tengjast atvinnulífinu og starfsumhverfi fyrirtækja. Lesendur fréttabréfsins eru eindregið hvattir til að senda upplýsingar um fundi eða ráðstefnur framundan á netfangið sa@sa.is.
Sjá nánar: Á döfinni

Stækkun Evrópska efnahagssvæðisins:

Lagt til að flutningur vinnuafls verði frjáls sjö árum eftir aðild nýrra ríkja
Innan Evrópusambandsins er nú rætt um að frjáls flutningur vinnuafls milli nýrra aðildarríkja Evrópusambandsins og þeirra, sem fyrir eru, taki ekki gildi fyrr en sjö árum eftir aðild nýrra ríkja. Það þýðir að gangi einhver af ríkjum Austur-Evrópu inn árið 2003, verður flutningur vinnuafls ekki frjáls fyrr en 2010. Stækkun ESB er jafnframt stækkun Evrópska efnahagssvæðisins og allir samningar ESB við ný ríki, þ.m.t. um aðlögunartíma af þessu tagi, gilda því einnig fyrir Ísland, Noreg og Liechtenstein.
Sjá nánar

Sænskt atvinnulíf opnar Evrópuvef
Samtök sænskra atvinnu- og iðnrekenda hafa opnað nýjan og áhugaverðan Evrópuvef á ensku, www.eu2001.swedishenterprise.se. Vefsetrið er sett á laggirnar í tilefni af því að Svíþjóð fer með formennsku í ráðherraráði Evrópusambandsins fyrri helming ársins 2001.
Sjá nánar


Umsagnir um þingmál á vefnum
Samtök atvinnulífsins hafa að undanförnu sent frá sér umsagnir um ýmis þingmál og fleiri umsagnir eru í vinnslu. Á vef SA er að finna yfirlit yfir þær beiðnir um umsagnir er berast frá Alþingi og hvaða starfsmaður SA ber ábyrgð á málinu. Aðildarfyrirtæki geta því komið sjónarmiðum sínum á framfæri við viðkomandi starfsmann. Hægt er að lesa allar umsagnir, sem samtökin hafa sent frá sér, á málefnavef SA.
Sjá nánar

Nýir málefnahópar taka til starfa í janúar
Sex nýir málefnahópar á vegum SA hefja störf í janúar. Um er að ræða hópa, sem fjalla um efnahagsmál, skattamál, lífeyrismál, Evrópu- og alþjóðamál, vinnumarkaðsmál, og umhverfismál. Fyrir voru málefnahópar um menntamál og um jafnréttis- og fjölskyldumál. Gert er ráð fyrir að hóparnir marki heildarstefnu SA, sem lögð verði fyrir á aðalfundi í maí.

Á annað hundrað fulltrúar aðildarfyrirtækja og aðildarfélaga SA eru nú skráðir í málefnahópa. Við minnum á að málefnastarf SA er opið öllum aðildarfélögum og aðildarfyrirtækjum. Enn er tækifæri til að skrá sig í málefnahóp og fylgjast þannig með starfi hópsins og fá upplýsingar um fundi í tölvupósti.
Sjá málefnavef SA

Nýtum tækifærið

Finnur Geirsson, formaður Samtaka atvinnulífsins, segir í áramótagrein sinni í Morgunblaðinu að framundan sé ómetanlegt tækifæri fyrir fyrirtækin í landinu, stjórnvöld og launafólk að tryggja framhald stöðugleikans, efla samkeppnisstöðu Íslands og treysta grunn sífellt betri lífskjara. Við höfum ekki efni á að sleppa því tækifæri.
Sjá nánar

Einkavæðingu verði hraðað
Stjórn Samtaka atvinnulífsins ályktaði á fundi sínum 12. desember að hraða bæri einkavæðingu opinberra fyrirtækja í fjarskipta-, fjármála- og orkugeira. Stjórnin gagnrýnir vöxt ríkisútgjalda samkvæmt nýsamþykktum fjárlögum. Hún hvetur til ítrasta aðhalds hjá fyrirtækjum og opinberum aðilum til þess að hægt sé að tryggja markmið kjarasamninga, efnahagslegan stöðugleika og bætt lífskjör.
Sjá nánar

Borgin hafnar útboði og hækkar gjöld fyrir sorphirðu
Borgarráð Reykjavíkur hefur ákveðið að hækka sorphirðugjald í borginni um 800 krónur á tunnu hjá fyrirtækjum frá og með áramótum. Þessi hækkun, sem nemur um 10%, vekur athygli í ljósi þess að nýlega vísaði meirihluti umhverfis- og heilbrigðisnefndar Reykjavíkur frá tillögu um að könnuð yrði hagkvæmni þess að bjóða út sorphirðu í borginni.
Sjá nánar

Reglugerð fyrir STARFSAFL - Starfsmennt Samtaka atvinnulífsins og Flóabandalagsins

Verkefnisstjórn Starfsafls, starfsmenntar ófaglærðra, hefur samþykkt reglugerð fyrir starfsemi sína. Starfsafli, sem er á vegum SA og Flóabandalagsins, er ætlað er að byggja upp menntun ófaglærðra, starfsfólki og fyrirtækjum til hagsbóta. Aukin hæfni og starfstengd menntun starfsmanna er nauðsynlegur þáttur í meiri framleiðni og bættri samkeppnisstöðu íslenskra fyrirtækja.
Sjá nánar

Lagaskylda að gera jafnréttisáætlun

Samkvæmt nýjum jafnréttislögum skulu fyrirtæki þar sem starfa fleiri en 25 starfsmenn setja sér jafnréttisáætlun eða kveða sérstaklega á um jafnrétti kvenna og karla í starfsmannastefnu sinni að viðlögðum sektum sem renna í ríkissjóð. Með því verður fyrirtækið að ákveða á hvern hátt það ætlar að tryggja sem best jafnrétti kynja. Samtök atvinnulífsins veita aðildarfyrirtækjum sínum aðstoð og ráðgjöf vegna gerðar jafnréttisáætlana og birta m.a. einfalda fyrirmynd að jafnréttisáætlun á vefnum.
Sjá nánar

Eyðublöð vegna foreldraorlofs á vef SA
Eyðublöð vegna töku foreldraorlofs hafa verið sett á vef SA ásamt skýringum. Þessum plöggum er ætlað að einfalda og skýra ferlið við töku foreldraorlofs og eyða hugsanlegum misskilningi milli starfsmanna og vinnuveitenda.
Sjá nánar

Hönnun og forritun: Vefur.is