Skoðun SA

„Stóriðjuframkvæmdir, ef af þeim verður, munu geta breytt útlitinu umtalsvert og náð að draga úr þeirri deyfð sem annars blasir við á næsta ári,“ segir Finnur Geirsson, formaður SA, í áramótaviðtali við Morgunblaðið. Þar fjallar hann m.a. um hátt launastig, vöxt samneyslunnar, einkavæðingu og mikilvægi stöðugleikans.

Í fjárlagafrumvarpi næsta árs er gert ráð fyrir 30 milljóna króna framlagi til ASÍ. Sú mismunun á opinberum fram-lögum sem hér er á ferðinni er alvarlegt brot á þeirri grundvallarreglu að jafnræði eigi að ríkja milli aðila vinnumarkaðarins, segir Ari Edwald, framkvæmdastjóri SA, í leiðara fréttabréfsins Af vettvangi.

Áhrif skattabreytinga síðasta árs voru þau að gjöld einstaklinga lækkuðu meira en gjöld fyrirtækja, segir Ari Edwald, framkvæmdastjóri SA í leiðara fréttabréfsins Af vettvangi. Brúttóáhrif skattabreytinganna á ríkissjóð voru þau, skv. frumvarpinu, að gjöld fyrirtækja lækkuðu um 1.700 m.kr. en gjöld einstaklinga um 5.400 m.kr.

Á fundi Stjórnvísi um samruna og yfirtökur lagði Ari Edwald, framkvæmdastjóri SA, áherslu á að stærð fyrirtækja væri ekki lykilatriði gagnvart samkeppni, enda „læddist samkeppnin alltaf aftan að mönnum.“ Samkeppnisyfirvöld ættu fyrst og fremst að vinna gegn misbeitingu á markaðsráðandi stöðu.

Stjórn SA lýsir í ályktun ánægju með fjárlagafrumvarp ríkisstjórnarinnar. Hún leggur áherslu á að útgjalda-áætlunin vaxi ekki í meðförum Alþingis né verði langtímahugsun frumvarpsins fórnað, hvetur ríkisstjórnina til að koma böndum á útgjaldaþenslu heilbrigðiskerfisins og fagnar því að hreyfing sé á ný komin á einkavæðingu ríkisfyrirtækja.

Fjárlagafrumvarp næsta árs einkennist frekar af langtímahugsun en af kosningaári, segir Hannes G. Sigurðsson, aðstoðarframkvæmdastjóri SA í leiðara fréttabréfsins Af vettvangi. Hann telur jafnframt að forsenda útgjaldaáætlana sé að það takist að hemja vöxtinn í heilbrigðiskerfinu.

Það er bráðnauðsynlegt að ráðast í frekari breytingar á samkeppnislögunum og það þarf að gerast á komandi þingi, segir Ari Edwald, framkvæmdastjóri SA, í samtali við Morgunblaðið. Hann segir réttarfarsþáttinn ekki síst knýja á um breytingar.

Það er mjög brýnt að samkeppnislögin og starfsreglur á þessu sviði verði tekin til gagngerrar endurskoðunar, segir Ari Edwald, framkvæmdastjóri SA, í leiðara fréttabréfsins Af vettvangi. Hann segir núgildandi lög draga úr kraftinum í íslensku athafnalífi, í harðri alþjóðlegri samkeppni, auk þess sem verulegir ágallar hafi komið í ljós á réttarfari í samkeppnismálum.

Líkur á uppbyggingu í ál- og orkuiðnaði hafa aukist mikið. Í leiðara fréttabréfsins Af vettvangi segir Ari Edwald, framkvæmdastjóri SA, framkvæmdirnar koma á heppilegum tíma fyrir efnahagslífið, en draga verði úr öðrum framkvæmdum eins og kostur er á sama tíma.

Lengri námstími en í nágrannalöndunum felur í sér kostnað fyrir þjóðfélagið jafnt sem nemendur. SA leggja til styttingu grunn- og framhaldsskólastigs um eitt ár hvort, segir Gústaf Adolf Skúlason, forstöðumaður stefnumótunar- og samskiptasviðs SA, í leiðara fréttabréfsins Af vettvangi.

„Með þessari leið getur kjölfestufjárfestir einfaldlega litið dagsins ljós á eftirmarkaði“ segir Ari Edwald, framkvæmda-stjóri SA, í leiðara fréttabréfsins Af vettvangi. Hann segir það skemmtilega tilraun að bjóða bréfin í Landsbanka Íslands ekki á tilteknu lágmarksverði, heldur selja í gegnum viðskiptakerfi Verðbréfaþings Íslands.

Hið opinbera hefur um margra ára skeið leitt launaþróun í landinu. Í erindi sínu á aðalfundi SA sagði Finnur Geirsson, formaður samtakanna, það útilokað að þetta gæti gengið. Hann sagði einkavæðingu og rekstrarútboð raunhæfustu lausnina.

Gamaldags gífuryrði um örbirgð og neyð eru ekki viðeigandi lýsing á íslensku þjóðfélagi, þegar kaupmáttur er í hámarki og full atvinna ríkir, segir Hannes G. Sigurðsson, aðstoðarframkvæmdastjóri SA, í leiðara fréttabréfsins Af vettvangi.

Fjöldi opinberra stofnana og fyrirtækja starfrækir sína eigin hugbúnaðarþjónustu. Í setningarræðu á ráðstefnu TölvuMynda sagði Ari Edwald, framkvæmdastjóri SA, að gera yrði þá kröfu til hins opinbera að það keppti ekki við einkafyrirtæki á þessu sviði.

Þetta útspil minnir á þann fleyg sem rekinn var í þríhliða samstarf aðila vinnumarkaðar og stjórnvalda að sameiginlegum markmiðum í febrúar árið 1991, segir Hannes G. Sigurðsson, aðstoðarframkvæmdastjóri SA, í leiðara fréttabréfsins Af vettvangi. Samlíking við 1980 sé hins vegar illa til fundin.

Það blasir við að sjálftaka heilsugæslulækna vegna útgáfu vottorða hefur aldrei verið heimil og minnir á löngu horfna tíma, segir Ari Edwald, framkvæmdastjóri SA, í leiðara fréttabréfsins Af vettvangi. Hann segir fróðlegt að bera málið saman við nýleg mál forstöðumanna Þjóðmenningarhúss og Þjóðskjalasafns.

Lagasetning til að sporna við uppsögnum vegna aldurs væri bjarnargreiði, segir Ari Edwald, framkvæmdastjóri SA, í samtali við Morgunblaðið. Hún kynni að draga úr líkum á ráðningu eldra fólks. Ari segir ástæðu til að skapa um það umræðu ef almennir fordómar séu gegn eldra starfsfólki.

Flest bendir til að varanlegt jafnvægi sé að skapast sem er forsenda frekari sóknar í íslensku efnahagslífi, segir Ari Edwald, framkvæmdastjóri SA, í leiðara fréttabréfsins Af vettvangi. Hann telur að færa megi rök fyrir því að raunstýrivextir Seðlabankans séu nær 7% en 0,7%, um þessar mundir.

Með ólíkindum hefur verið að fylgjast með upphrópunum sumra stjórnmálamanna í framhaldi af málefnalegum athugasemdum SA og VÍ um samkeppnislög og vinnubrögð Samkeppnisstofnunar, segir Ari Edwald, framkvæmdastjóri SA, í leiðara fréttabréfisins Af vettvangi. Hann segir endurskoðun samkeppnislaga óhjákvæmilega.

Stjórn Samtaka atvinnulífsins fagnar ákvörðunum opinberra aðila og fyrirtækja um lækkanir á verði og gjaldskrám. Þessar aðgerðir, ásamt aðhaldssamri verðlagningu fyrirtækja á markaði, eiga að geta leitt til þess að verðlagsmarkmið í maí nk. náist og þannig verði komist hjá hugsanlegri víxlverkun verðlags- og launahækkana.

Í erindi á ráðstefnu Stúdentaráðs Háskóla Íslands um tengsl háskóla og atvinnulífs lagði Gústaf Adolf Skúlason frá SA megináherslu á mikilvægi samkeppnishugsunar í skólakerfinu. Hann fjallaði m.a. um jákvæð áhrif aukinnar samkeppni á viðskiptadeild HÍ.

Opinberir aðilar jafnt sem fyrirtækin verða að fara yfir og endurmeta tilefni verðlagshækkana, segir Ari Edwald, framkvæmdastjóri SA, í viðtali við Morgunblaðið. Framkvæmdastjóri ASÍ segir enga ástæðu til að menn fari á taugum, þótt svigrúmið sé lítið.