Pistlar um loftslagsmál
Á vef Samtaka atvinnulífsins hefur verið birtur fjöldi pistla um loftslagsmál og stöðu Íslands og íslenskra fyrirtækja í þeim efnum.
Í tengslum við loftslagsráðstefnu S.Þ. í Kaupmannahöfn sem fram fór í desember 2009 skrifaði Pétur Reimarsson, forstöðumaður hjá SA, t.a.m. fjölda pistla en hann var fulltrúi SA á ráðstefnunni. Í þeim er greint frá því helsta sem gerðist í Kaupmannahöfn auk þess sem fjallað er um niðurstöður ráðstefnunnar.
Pistla um loftslagsráðstefnu S.Þ. í Kaupmannahöfn 2009 (COP-15) má nálgast hér
Tengla á eldri pistla má nálgast hér að neðan en þar er m.a.varpað ljósi á hvers vegna Ísland stendur vel að vígi í loftslagsmálum í alþjóðlegum samanburði.
Sérstaða Íslands í loftslagsmálum
Enginn vafi er á að bæði einstaklingar og atvinnulíf munu finna fyrir auknum kröfum um að dregið verði úr útstreymi gróðurhúsalofttegunda á næstu árum og áratugum. Atvinnulíf á Íslandi stendur hins vegar almennt vel að vígi á þessu sviði m.a. vegna þess að raforkuframleiðsla á Íslandi veldur ekki útstreymi gróðurhúsalofttegunda. Vísindanefnd Sameinuðu þjóðanna hefur bent á að loftslagsbreytingar megi fyrst og fremst rekja til brennslu jarðefnaeldsneytis, landbúnaðar og breytinga á landnotkun. Alþjóðasamfélagið hefur jafnframt viðurkennt sérstöðu Íslands sem felst í nýtingu á endurnýjanlegum orkulindum, t.d. við framleiðslu á áli sem feli í sér minni áhrif á verðurfarskerfi heldur en almennt gerist með álframleiðslu annars staðar í heiminum.
Ísland og markmið Kyoto-bókunarinnar
Allt bendir til þess að Íslensk stjórnvöld muni standa við skuldbindingar sínar samkvæmt Kyoto-bókuninni við loftslagssamning Sameinuðu þjóðanna. Mikilvægt er samt að kannað verði hvaða möguleikar eru til öflunar útstreymisheimilda erlendis frá og eins hvort hagkvæmt geti verið að auka kolefnisbindingu innan lands.
Minnkandi útstreymi gróðurhúsalofttegunda hérlendis
Á Íslandi hefur almenn losun gróðurhúsalofttegunda dregist saman frá árinu 1990 og er lítil í alþjóðlegum samanburði. Engin ástæða er til að ætla annað en að þessi þróun geti haldið áfram en undanfarin ár hefur útstreymi t.d. farið minnkandi hér í fiskimjölsframleiðslu, fiskveiðum og iðnaði. Íslendingar eru í þeirri sérstöku stöðu að ef öll efnahagsstarfsemi legðist af hér á landi eru allar líkur á því að útstreymi gróðurhúsalofttegunda í heiminum ykist því gera má ráð fyrir að stór hluti af ál- og járnblendiframleiðslu landsins yrði framleitt með orku úr jarðefnaeldsneyti.
Útstreymi gróðurhúsalofttegunda og alþjóðlegt samhengi
Spáð er tvöföldun útstreymis gróðurhúsalofttegunda í heiminum fyrir árið 2050 og að aukningin verði mest hjá ríkjum sem ekki tókust á hendur skuldbindingar samkvæmt Kyoto-bókuninni. Full þátttaka stærri hagkerfa er forsenda árangurs aðgerða til takmörkunar á losun gróðurhúsalofttegunda. Framlag Íslendinga felst ekki síst í nýtingu endurnýjanlegra orkulinda til framleiðslu áls og járnblendis. Lítill hluti framleiðslunnar kemur til notkunar hér á landi en framleiðslan gæti allt eins verið annars staðar og nýtt orkugjafa eins og kol eða annað jarðefnaeldsneyti. Þá hafa Íslendingar mikilvægu hlutverki að gegna með þekkingu sinni á nýtingu endurnýjanlegra orkugjafa eins og jarðhita og vatnsafli.
Frá Kyoto til Kárahnjúka
Engar hömlur eru lagðar á það hvað einstök ríki geta nýtt af kola-, gas- og olíuauðlindum sínum í loftslagssamningi SÞ eða Kyoto-bókuninni, og því er ekki skynsamlegt að takmarka nýtingu Íslands á endurnýjanlegum orkulindum sínum til raforkuframleiðslu. Til að framleiða samsvarandi orku með kolum og Kárahnjúkavirkjun mun skila, þarf að brenna 1,5 milljón tonnum af kolum á ári og útstreymi gróðurhúsalofttegunda af þeim sökum er meiri en heildarlosun Íslendinga á gróðurhúsalofttegundum á einu ári.
Ísland stendur vel að vígi í loftslagsmálum
Ísland er meðal þeirra ríkja í heiminum þar sem útstreymi gróðurhúsa-lofttegunda er hvað minnst. Á tímabilinu frá 1990 til 2003 minnkaði útstreymi á hvern íbúa hér á landi um 18% en um 6% ef heimildir samkvæmt svokölluðu íslensku ákvæði við Kyoto-bókunina eru taldar með. Allir mælikvarðar benda til þess að Ísland sé í fremstu röð vestrænna ríkja við takmörkun útstreymis gróðurhúsalofttegunda. Landið stendur þar af leiðandi vel að vígi við að uppfylla ákvæði Kyoto-bókunarinnar á tímabilinu 2008 til 2012. Stefnumótun um framhaldið er á döfinni og mikilvægt að íslensk stjórnvöld aðgæti þá að góður árangur hingað til torveldar umfangsmiklar skuldbindingar síðar.
Af Kyoto-markmiðum og G8 fundinum í Gleneagles
Af þeim vestrænum ríkjum sem hafa staðfest Kyoto-bókunina hefur aðeins fáum þegar tekist að ná markmiðum um takmörkun á losun gróðurhúsalofttegunda. Ísland er þeirra á meðal, en dregið hefur úr losun lofttegundanna á Íslandi frá árinu 1990. Á árinu 2003 jókst útblástur gróðurhúsa- lofttegunda hlutfallslega meira í Evrópusambandinu en í Bandaríkjunum. Í síðustu viku samþykktu stjórnendur átta helstu iðnríkja heims tímamótaályktun um loftslagsmál og losun gróðurhúslofttegunda til að draga úr losuninni til framtíðar.
Leit
Stjórnborð
Fánar
