Starfsumhverfi atvinnulífsins

Það kæmi á óvart ef menn sæju ástæðu til þess að efna til kjaradeilna nú, þegar höfð er í huga hin mikla aukning kaupmáttar undanfarin ár, segir Ingimundur Sigurpálsson, formaður SA, í áramótasamtali við Morgunblaðið. Hann segir mestu skipta að andrúmsloftið er jákvætt og að almenn ánægja ríkir með árangur af yfirstandandi samningum, sem hafa skilað launafólki meiri raunhækkun launa en dæmi eru um áður.

Ráðgjafarnefnd EFTA hvetur EFTA/EES-ríkin til að gera áætlanir um góða virkni hins sameiginlega innri markaðar. Í áliti nefndarinnar er m.a. fjallað um mikilvægi kynningar-átaks um EES meðal núverandi og væntanlegra aðildarríkja ESB, um lágmörkun reglubyrði, gagnkvæmar viðurkenningar o.fl.

Hlutfall 65 ára og eldri er það 5. lægsta hér á landi af 30 löndum OECD, en heildarútgjöld til heilbrigðismála þau 5. hæstu, sem hlutfall af landsframleiðslu. Þá eru útgjöld hins opinbera til heilbrigðismála næst hæst hérlendis og hafa hækkað mest hér á undanförnum áratugum. Þar sem hlutfall eldra fólks er lægra en hér eru heilbrigðisútgjöld mun lægri.