Starfsumhverfi atvinnulífsins
30.12.2001
Lítið dregið úr áræðni og stórhug margra fyrirtækja
Í áramótaviðtali Morgunblaðsins við Finn Geirsson, formann SA, segir hann m.a. ánægjulegt að sjá að þrátt fyrir ýmis vonbrigði og áföll á liðnu ári hafi lítið dregið úr áræðni og stórhug margra fyrirtækja. Hann segir brýnt að búa svo um hnúta að gengi krónunnar haldist sem stöðugast.
6.12.2001
Tafir á umsögnum um atvinnuleyfi
Að undanförnu hefur talsvert borið á tregðu nokkurra stéttarfélaga við veitingu umsagna um atvinnuleyfis-umsóknir fyrir útlendinga. Tafir hafa orðið og tengingar við óskyld mál. Þá virðist stöðuhækkun starfsmanns geta þvælst fyrir við endurnýjun atvinnuleyfis.
23.11.2001
Frjáls för fólks eftir stækkun ESB
Ekki er ástæða til að ætla að stækkun ESB hafi í för með sér mikinn straum fólks frá nýjum aðildarríkjum í atvinnuleit. Einstök aðildarríki ESB vilja þó aðlögunartíma en EFTA ríkin sjá ekki ástæðu til þess. Þetta kemur fram í ályktun ráðgjafanefndar EES.
15.11.2001
Samkomulag um WTO-lotu fagnaðarefni
Samtök atvinnulífsins fagna niðurstöðu ráðherrafundar WTO um að hefja nýja lotu samningaviðræðna um aukið frelsi í alþjóðaviðskiptum. Niðurstaðan eflir tiltrú á fríverslun á alþjóðavettvangi, öllum til hagsbóta.
8.11.2001
Meiri gæði á einkareknum heilsugæslustöðvum
Samkvæmt nýrri sænskri rannsókn eru sjúklingar sem sækja einkareknar heilsugæslustöðvar ánægðari með þjónustuna og aðgengi að læknum en sjúklingar sem sækja stöðvar í opinberum rekstri.
3.11.2001
Hraða ber einkavæðingu
Hraða ber einkavæðingu hér á landi, einkum á fjármála- og fjarskiptafyrirtækjum, að sögn Michaels Walker hjá Fraser Institute. Hann segir miklar framfarir hafa átt sér stað hér á landi en varar við hækkun opinberra útgjalda.
31.10.2001
Þokkalegar afkomuvæntingar fyrirtækja
Tæp 30% fyrirtækja reikna með versnandi afkomu á næstu mánuðum, en um 20% reikna með að afkoman fari batnandi. Best er hljóðið í fjármála- og sjávarútvegsfyrirtækjum en verst í fyrirtækjum í ferðaþjónustu.
31.10.2001
Ánægja með skattafrumvarp
Tæp 45% fyrirtækja telja að fyrirhugaðar breytingar á skattaumhverfinu muni hafa jákvæð áhrif á afkomu sína, en um 20% telja áhrifin verða neikvæð. Almennust mælist ánægjan meðal fjármálafyrirtækja og í iðnaði.
17.10.2001
Ísland færist ofar í samkeppnismati
Ísland er í 16. sæti á lista yfir 75 ríki þar sem lagt er mat á samkeppnishæfni þeirra, en var í 23. sæti í fyrra. Listinn er byggður á úttekt Alþjóða efnahagsstofnunarinnar í samvinnu við Harvard-háskóla.
12.10.2001
Samdráttur framundan hjá iðnfyrirtækjum
Samtök iðnaðarins hafa birt niðurstöður könnunar á stöðu og horfum í starfsemi 87 fyrirtækja. Hægt hefur á veltu í flestum greinum, fjárfestingar dregist saman og starfsmönnum fækkað. Framhald verður á þeirri þróun. Sjá nánar á heimasíðu SI.
4.10.2001
Gott útspil í skattamálum
Útspil ríkisstjórnarinnar í skattamálum frá því í gær er í heild afar jákvæð niðurstaða fyrir atvinnulífið og góðar fréttir fyrir íslenskt efnahagslíf, segir Ari Edwald, framkvæmdastjóri SA, í leiðara fréttabréfsins Af vettvangi.
29.9.2001
„Evra – hvað gerist 1. janúar 2002?“
Um næstu áramót tekur evran við af tólf gjaldmiðlum Evrópuríkja. Breytingin mun snerta almenning og fyrirtæki á Íslandi á ýmsa vegu. Nú hafa bankar og sparisjóðir, í samvinnu við SBV, gefið út bækling sem svarar ýmsum spurningum vegna þessa.
27.9.2001
Samkeppni í framleiðslu og sölu á rafmagni
SA og SI hafa skilað sameiginlegri umsögn um frumvarp til raforkulaga. Með frumvarpinu eru sköpuð skilyrði fyrir virka samkeppni á raforkumarkaði sem leiðir til aukinnar hagkvæmni og lægra raforkuverðs, og styðja samtökin eindregið þá stefnumótun.
26.9.2001
Öll efnahagsleg rök með skattalækkun
Nánast öll efnahagsleg rök mæla með skattalækkun á fyrirtæki, jafnvel myndarlegri skattalækkun, að sögn Bolla Þórs Bollasonar, skrifstofustjóra efnahagsskrifstofu fjármálaráðuneytisins. Í ráðuneytinu hafa veltuáhrif skattalækkana verið til skoðunar.
11.9.2001
67% félagsmanna SI vilja evru
Samkvæmt niðurstöðum skoðanakönnunar sem Gallup vann fyrir Samtök iðnaðarins vilja 67% félagsmanna SI taka upp evru í stað íslensku krónunnar. Þá eru 49,9% þjóðarinnar fylgjandi aðild Íslands að ESB.
6.9.2001
Hve langt á að ganga í því að taka upp nýjar Evrópureglur ?
Tilskipunum ESB á sviði félagsmála fjölgar stöðugt. Margar þeirra eru til þess fallnar að draga úr sveigjanleika íslensks vinnumarkaðar. Að mati SA er mikilvægt að ekki sé gengið lengra við innleiðingu þeirra en nauðsynlegt er vegna EES-samningsins.
6.9.2001
Samtals sjö milljarða tap af rekstri 67 fyrirtækja
Afkoma 67 fyrirtækja, sem fréttir hafa borist af, var mun verri á fyrri helmingi árs en á sama tíma í fyrra. Rúmlega fjögurra milljarða hagnaður snerist í sjö milljarða tap. Arðsemi eigin fjár var tæplega -8% í ár en 5,5% árið 2000. Rekstrarafgangur fyrir fjármagnsliði jókst hins vegar úr 3,8 milljörðum árið 2000 í tæpa sjö milljarða árið 2001.
6.9.2001
Skattalækkun á fyrirtæki tímabær
Að halda til streitu óhagstæðum mun gagnvart öðrum löndum, varðandi t.d. eignarskatt og stimpilgjöld, veikir allt efnahagslífið og tekjugrundvöll ríkisins til framtíðar, segir Ari Edwald, framkvæmdastjóri SA, í leiðara fréttabréfsins Af vettvangi.
30.8.2001
Fjármálaráðuneytið: brýnt að lækka vexti og skatta á atvinnulífið
Það er mat fjármálaráðuneytisins að fremur sé ástæða til að óttast samdrátt í efnahagslífinu en ofþenslu. Því beri að bæta rekstrarskilyrði atvinnulífsins og brýnt sé að lækka vexti og lækka skatta á atvinnulífið.
29.8.2001
Tími óbreyttrar vaxtastefnu er liðinn
Sú ofþensla sem kallaði á vaxtahækkanir Seðlabankans á sínum tíma er ekki lengur fyrir hendi. Tími óbreyttrar vaxtastefnu er liðinn, sagði Ari Edwald, framkvæmdastjóri SA, í erindi um vaxtamálin.
2.8.2001
Hömlulaust eftirlit og gjaldtaka
Atvinnulífið þarfnast ekki enn meiri aragrúa af opinberum gjöldum og skriffinsku. Mun nærtækara væri að grisja eitthvað af þeim gríðarlega fjölda smærri gjalda og óbeinna skatta sem atvinnulífið þarf nú þegar að greiða, og einfalda og sameina ýmsar leyfisveitingar, segir Ari Edwald, framkvæmdastjóri SA, í leiðara fréttabréfs SA.
1.8.2001
Gjöldin langhæst í Reykjavík
Reykjavíkurborg hyggst innheimta tvisvar til þrisvar sinnum hærra gjald en nágrannasveitarfélögin fyrir tóbakssöluleyfi. Þá hyggst borgin innheimta sérstakt undanþágugjald sem innifalið er í leyfisgjaldinu hjá nágrannasveitarfélögunum.
16.7.2001
Viðskiptahindranir á innri markaðnum?
Á vegum framkvæmdastjórnar ESB er nú unnið að úttekt á þeim hindrunum sem enn fyrirfinnast í viðskiptum með vörur á innri markaðnum. Fyrirtæki sem upplifa slíkar hindranir eru beðin að fylla út rafrænt spurningaeyðublað um málið.
5.7.2001
Auka þarf tiltrú á atvinnulífið
„Það sem mestu skiptir nú er að treysta tiltrú á atvinnulífið og sporna gegn því að samdráttur verði of mikill“, segir í ályktun stjórnar Samtaka atvinnulífsins frá því í dag. Til mótvægis við þá þróun hvetja Samtök atvinnulífsins til vaxtalækkana, skattalækkana á fyrirtæki, að einkavæðingu verði hraðað og að fyrirtæki og opinberir aðilar sýni ítrasta aðhald í verðlagsmálum.
25.6.2001
Um heimsmetið í verkföllum
Íslendingar hafa um langt árabil trónað á toppinum í alþjóðlegum samanburði um tapaða vinnudaga vegna verkfalla. Á almenna vinnumarkaðinum eru Íslendingar hins vegar nálægt meðaltali bæði OECD-ríkja og ESB.
19.6.2001
Ný kaupalög kynnt
Lenging ábyrgðartíma söluhluta úr einu ári í tvö, lenging ábyrgðartíma byggingarefna í fimm ár og rýmkaðar kröfuheimildir vegna gallaðra söluhluta eru meðal breytinga sem ný kaupalög hafa í för með sér. Lögin tóku gildi 1. júní.
1.6.2001
„Verjum skattaforskotið með oddi og egg“
Á aðalfundi SA fjallaði framkvæmdastjóri Samtaka atvinnulífsins á Írlandi m.a. um mikilvægi samkeppnishæfs skattaumhverfis fyrir írska hagkerfið. Hann segir félaga Íra í ESB ekki taka því of fagnandi en bætir því við að Írar muni verja forskot sitt með oddi og egg. Erindið er nú komið á vef SA í íslenskri þýðingu.
30.5.2001
Umhverfi til nýsköpunar á Íslandi
Um 19% allra landsmanna á aldrinum 18-75 ára hafa komið að stofnun fyrirtækis, samkvæmt niðurstöðum skoðanakönnunar. Þetta er meira en tvöfalt hærra hlutfall en það sem hæst gerist í samanburðarlöndum. Þetta er meðal þess sem fram kemur í ritinu Umhverfi til nýsköpunar á Íslandi sem kynnt var í dag. Ritið er samstarfsverkefni SA, Deloitte & Touche og Nýsköpunarsjóðs.
15.5.2001
Ísland í fremstu röð
„Við stöndum um margt betur að vígi en áður undir svipuðum kringumstæðum og með samstilltu átaki og góðri samvinnu eru góðar líkur á að Ísland geti áfram verið í fremstu röð á meðal þeirra þjóða sem best hafa lífskjör", sagði Finnur Geirsson, formaður SA, í ræðu sinni á aðalfundi SA. Sjá ræðu Finns.
3.5.2001
Afnám stimpilgjalda
Innheimta stimpilgjalda hefur á undanförnum árum verið á hröðu undanhaldi hjá öðrum ríkjum, en gjöldin geta leitt til tvísköttunar og jafnvel margsköttunar. Íslensk fyrirtæki starfa nú í alþjóðlegu umhverfi og afar mikilvægt er að þau sæti ekki sérstökum samkeppnishindrunum. Hlutfall stimpilgjalda af heildarskatttekjum ríkissjóðs hefur farið lækkandi á síðustu árum og Samtök atvinnulífsins leggja til að þau verði afnumin, enda um úrelta skattheimtu að ræða og alvarlega samkeppnishindrun hvað snertir útgáfu og viðskipti með viðskiptabréf.
24.4.2001
Samræmdar útboðsreglur á landinu öllu
Markmiðið með innri markaði EES var að samræmdar reglur giltu á öllu svæðinu. Á Íslandi er hins vegar í gildi mismunandi viðskiptaumhverfi milli sveitarfélaga, sem er óviðunandi, sagði Ari Edwald, framkvæmdastjóri SA, í erindi á fundi SI um breytingar á lögum um opinber innkaup. Helga Jónsdóttir, borgarritari, sagði öll efnisleg rök fyrir því að sömu reglur giltu á landinu öllu.
4.4.2001
Frumvarp til breytinga á lögum um stimpilgjald
Margrét Frímannsdóttir hefur lagt fram frumvarp til laga um breytingu á lögum um stimpilgjald, þar sem lagt er til að þau verði felld niður í áföngum af skjölum sem ekki ber skylda til að þinglýsa, og að stimpilgjald þinglýstra skjala skuli lækkað niður í raunkostnað við þá þjónustu sem veitt er við stimplunina. Sjá frumvarpið.
30.3.2001
Forsjárhyggjan og löggæslumenn viðskiptalífsins
„Forsjárhyggjan lifir enn góðu lífi og ný stétt manna – löggæslumenn viðskiptalífsins – hefur sprottið upp,“ sagði Óli Björn Kárason m.a. í erindi sínu á aðalfundi SVÞ. Óli rakti
þrjú dæmi um „hvernig ríkið setur eða ætlar að setja skorður við athafnafrelsi manna.“ Valgerður Sverrisdóttir sagði samruna milli fyrirtækja í fæstum tilfellum skapa samkeppnisleg vandamál.
16.3.2001
Hætta á harðri lendingu efnahagslífsins
Hátt gengi, há laun og háir vextir vega að samkeppnisstöðu íslenskra fyrirtækja, segir í ályktun iðnþings Samtaka iðnaðarins. Varað er við hættu á harðri lendingu efnahagslífsins, bíði stjórnvöld of lengi með vaxta- og skattalækkanir.
15.3.2001
Bandaríkin framar Evrópu í vaxtargreinum
Ætli Evrópuríkin sér að verða samkeppnishæf þekkingarsamfélög þurfa þau að taka sig á, samkvæmt nýrri skýrslu Samtaka evrópskra atvinnu- og iðnrekenda (UNICE) um hið svonefnda „nýja hagkerfi“. Ísland kemur sums staðar vel út í samanburðinum.
9.3.2001
„Boð og bönn tryggja ekki störf”
Mikilvægi sveigjanleikans á íslenskum vinnumarkaði var meðal helstu umfjöllunarefna á málþingi SA og norrænu ráðherranefndarinnar um Evrópuvinnurétt og jafnréttislöggjöf. Ari Edwald, framkvæmdastjóri SA, og Þórarinn V. Þórarinsson, forstjóri Landssímans, sögðu m.a. að takmarkanir á rétti fyrirtækja til þess að segja upp starfsfólki gætu haft þau áhrif að fækka störfum í stað þess að fjölga þeim.
1.3.2001
Hagnaður fyrirtækja þriðjungur fyrra árs
Hagnaður tuttugu og fjögurra fyrirtækja sem birt hafa uppgjör á Verðbréfaþingi var samtals um 3 milljarðar árið 2000, af reglulegri starfsemi fyrir skatta. Árið á undan var hagnaður sömu fyrirtækja rúmir 9 milljarðar og fellur hagnaðurinn úr 10% af veltu í 3%.
1.3.2001
Samkeppnislög þarf að endurskoða
Úrskurður áfrýjunarnefndarinnar í prentsmiðjumálinu er mikið fagnaðarefni,
og vekur menn til umhugsunar um hver afstaða nefndarinnar hefði verið í
bankamálinu. Samkeppnisráð hefur verið á rangri leið í áherslu sinni á
markaðsráðandi stöðu og í þröngri skilgreiningu markaða. Þörf er á
nýrri endurskoðun samkeppnislaga, segir Ari Edwald, framkvæmdastjóri SA, í leiðara fréttabréfsins Af vettvangi.
27.2.2001
Úrskurði áfrýjunarnefndar samkeppnismála fagnað
Samtök atvinnulífsins fagna þeirri niðurstöðu áfrýjunarnefndar samkeppnismála að kaup Odda hf. á Steindórsprenti-Gutenberg ehf. standist samkeppnislög og úrskurði hennar þess efnis að ákvörðun samkeppnisráðs frá 15. desember 2000 skuli felld úr gildi.
16.2.2001
Málþing um Evrópuvinnurétt og jafnréttislöggjöf
Að málþinginu standa Samtök atvinnulífsins í samstarfi við Norrænu ráðherranefndina, dagana 9.-10. mars á Hótel Loftleiðum. Dagskrá, almennar upplýsingar og skráningareyðublöð eru nú komin á vef SA.
1.2.2001
Vaxtalækkun í kortunum
Hvergi í sambærilegum löndum eru vextir eins háir og hér á landi og fer vaxtamunurinn hratt vaxandi. Í ljósi þeirrar þróunar, tafa á áhrifum vaxtalækkunar og þess hve skammt er enn liðið frá síðustu vaxtahækkun verður að teljast varfærið að lækka forvexti um 0,5 prósentustig. Það væri skref í rétta átt, segir Ari Edwald, framkvæmdastjóri SA í leiðara fréttabréfsins Af vettvangi. 
Sjá nánar
4.1.2001
Bjarnargreiði við neytendur
Hlutverk Samkeppnisstofnunar er ekki að stýra uppbyggingu íslensks atvinnulífs, heldur að beita sér gegn ólögmætu atferli. Það sem skiptir mestu máli er að bregðast við misnotkun á markaðsráðandi stöðu en ekki að banna markaðsráðandi stöðu í sjálfri sér, skrifar Ari Edwald, framkvæmdastjóri SA. Það hlýtur að vera algert neyðarúrræði að banna samruna fyrirtækja. Því miður virðist veruleg hætta á að óbreyttar áherslur Samkeppnisstofnunar verði fyrst og fremst ósigur fyrir
framleiðniþróun og bætt lífskjör á Íslandi.
4.1.2001
Bjarnargreiði við neytendur
Hlutverk Samkeppnisstofnunar er ekki að stýra uppbyggingu íslensks atvinnulífs, heldur að beita sér gegn ólögmætu atferli. Það sem skiptir mestu máli er að bregðast við misnotkun á markaðsráðandi stöðu en ekki að banna markaðsráðandi stöðu í sjálfri sér, skrifar Ari Edwald, framkvæmdastjóri í leiðara fréttabréfs SA sem kom út í dag. Hann segir að það hljóti að vera algert neyðarúrræði að banna samruna fyrirtækja. Því miður virðist veruleg hætta á að óbreyttar áherslur Samkeppnisstofnunar verði fyrst og fremst ósigur fyrir framleiðniþróun og bætt lífskjör á Íslandi. Sjá nánar
1.1.2001
Nýtum tækifærið
Finnur Geirsson, formaður Samtaka atvinnulífsins, segir í áramótagrein sinni í Morgunblaðinu að framundan sé ómetanlegt tækifæri fyrir fyrirtækin í landinu, stjórnvöld og launafólk að tryggja framhald stöðugleikans, efla samkeppnisstöðu Íslands og treysta grunn sífellt betri lífskjara. Við höfum ekki efni á að sleppa því tækifæri. Sjá nánar
Leit
Stjórnborð
Fánar
