Fréttir

Hagfræðideild Háskóla Íslands efnir til morgunfundar um samkeppnishæfni þjóða föstudaginn 6. júní, hvernig hún er mæld og hvernig þjóðir geti aukið samkeppnishæfni sína. Xavier Sala-i-Martin mun fjalla um mælikvarða á samkeppnishæfni þjóða en hann er prófessor í þjóðhagfræði við Columbia háskóla í New York.  Xavier gegnir ýmsum ráðgjafastörfum,  hann er t.a.m. ráðgjafi World Economic Forum í Davos. Hann hefur einnig unnið við mælingar á samkeppnishæfi þjóða og komið að ritstjórn Global Competitiveness Report.

Þann 1. júní næstkomandi mun Andrés Magnússon taka við sem framkvæmdastjóri SVÞ - Samtaka verslunar og þjónustu. Andrés er lögfræðingur að mennt og starfaði áður sem framkvæmdastjóri Félags íslenskra stórkaupmanna (FÍS). Sigurður Jónsson, sem gegnt hefur starfi framkvæmdastjóra SVÞ, mun taka að sér önnur verkefni fyrir atvinnurekendur.

Af þeim sem sótt hafa þriggja anna náms- og starfsendurhæfingu á vegum Hringsjár, starfsþjálfunar fatlaðra, höfðu 1,4% framfærslu af atvinnutekjum þegar þeir komu þangað, en um 10% þeirra hafa framfærslu af atvinnutekjum nú. Þetta er mikill og góður árangur. Fyrir náms- og endurhæfingu voru 86,6% hópsins sem lifðu eingöngu á örorku- og endurhæfingarlífeyri, en þeir eru nú tæp 48%. Fyrir námið í Hringsjá höfðu 2,8% hópsins framfæri af blöndu af örorkulífeyri og atvinnutekjum en eftir að hafa lokið náminu eru það 32,4%. Þetta kom fram á kynningardegi Hringsjár.

Samtök atvinnulífsins, Landssamband íslenskra útvegsmanna og Samtök fiskvinnslustöðva styðja eindregið að leidd skuli í lög hér á landi matvælalöggjöf Evrópusambandsins. Meginatriði löggjafarinnar er að ekki er lengur greint á milli sjávarafurða, búfjárafurða og annarra matvæla heldur gilda í meginatriðum sömu kröfur um framleiðslu matvæla. Þetta tryggir jafnari samkeppnisstöðu íslenskrar matvælaframleiðslu gagnvart framleiðslu á EES svæðinu og skapar fyrirtækjum aukna möguleika til að flytja inn hráefni til framleiðslu sinnar, aukna möguleika til nýsköpunar, vöruþróunar og almennra viðskipta. Að auki greiðir löggjöfin leið heilnæmra íslenskra landbúnaðarafurða á innri markaðinn í Evrópu. Þrátt fyrir almennan stuðning sem samtökin veita frumvarpinu gera þau athugasemdir við fjölmörg efnisatriði sem tengjast eftirliti, gjaldtöku og fleiru.

Efnt verður til málþings um menntun til sjálfbærrar þróunar í Kennaraháskólanum í Reykjavík næstkomandi föstudag. Það eru umhverfisfræðsluráð og menntamálaráðuneytið sem boða til málþingsins í samvinnu við rannsóknarhóp Kennaraháskólans og Háskólans á Akureyri. Rannsóknarhópurinn vinnur nú að rannsóknar- og þróunarverkefninu GETA til sjálfbærni - menntun til aðgerða. SA eiga fulltrúa í umhverfisfræðsluráði - málþingið er opið öllum og aðgangur er ókeypis.

Samtök atvinnulífsins hafa undanfarnar vikur boðið félagsmönnum sínum upp á námskeið um jafnréttisáætlanir fyrirtækja, gerð þeirra og framkvæmd samkvæmt nýjum lögum um jafna stöðu og jafnan rétt karla og kvenna. Námskeiðin voru afar vel sótt og heppnuðust vel en um var að ræða vinnustofu þar sem þátttakendur tóku virkan þátt en efni námskeiðanna var lagað að þörfum þátttakenda hverju sinni og fyrirtækjum þeirra. Fjallað var sérstaklega um samþættingu á gerð jafnréttis- og framkvæmdaáætlana skv. lögunum við stefnumótun fyrirtækja og mannauðsstjórnun þeirra. Leiðbeinendur voru frá Attentus, mannauði og ráðgjöf auk þess sem Samtök atvinnulífsins kynntu sjónarmið sín á sviði jafnréttismála.

Rætt er við Þór Sigfússon, nýjan formann SA, í ítarlegu viðtali í helgarblaði Viðskiptablaðsins. Þar segir hann SA vera skemmtilegan vettvang þar sem komi inn nýjar hugmyndir um samfélagið og hvernig hægt sé að byggja upp lífsgæðin hér með því að horfa til nýrra kynslóða um leið og kjarnastarfsemin sé traust. Þór segir að Íslendingar hafi hingað til verið sparir á umræðuna um framtíðarstefnumótun. „Í Finnlandi hefur til að mynda verið formfest betur öll umræða um framtíðarstefnumótun og það er meðal annars fastur liður í starfi finnska þingsins. Ég á mér þann draum að svo verði einnig hér, bæði á vettvangi þingsins og í stærstu sveitarstjórnum," segir Þór í samtali við Viðskiptablaðið.

Gengislækkun krónunnar og mikil hækkun á verðlagi í kjölfarið hafa skapað nýjar og lakari forsendur fyrir íslenskt atvinnulíf, heimilin og þjóðarbúið allt. Mikilvægasta verkefnið framundan er að vinna þannig úr vandanum að stöðugleiki og atvinna haldist eftir því sem frekast er kostur. Brjótast þarf út úr því umsátursástandi sem ríkir um íslenskan fjármálamarkað og tryggja atvinnulífinu aðgang að erlendu lánsfé á eðlilegum kjörum. Gengislækkunin má ekki setja í gang nýja verðbólguskrúfu með víxlhækkunum launa og verðlags heldur verður að byggja lífskjör þjóðarinnar upp á nýjan leik á traustum grunni. Mestu máli skiptir að hjól atvinnulífsins fái að snúast þannig að atvinna haldist. Þannig verða lífskjörin best tryggð og forsenda sköpuð til að ná því til baka sem tapast hefur og hefja nýja sókn til bættra lífskjara. Þetta segir Vilhjálmur Egilsson, framkvæmdastjóri SA, í leiðara fréttabréfsins Af vettvangi.

Veikindafjarvistir jukust á árinu 2007 hjá fyrirtækjum sem nota þjónustu Heilsuverndarstöðvarinnar við skráningu og greiningu fjarvista eftir að hafa farið minnkandi árin þar á undan. Starfsmenn voru að meðaltali fjarverandi 8,8 vinnudaga vegna veikinda árið 2007 sem nemur 3,9% af heildarvinnudögum. Starfsmenn á miðjum aldri og eldri eru síður fjarverandi vegna veikinda en yngra starfsfólkið og eru yngri aldurshópar tvöfalt meira frá vinnu en þeir eldri. Yngra fólk er oftar fjarverandi frá vinnu en þeir eldri en skemmri tíma í einu, en langtímafjarvistir fara vaxandi með aldri. Konur fá leyfi vegna veikinda barna í mun meira mæli en karlar og er skiptingin 68% á móti 32%, en hlutur karla fer þó vaxandi. Algengasta ástæða veikindafjarvista eru pestir eða flensur sem skýra fjórðung veikindafjarvista.

Þriðjudaginn 6. maí var stofnað til vettvangs atvinnulífsins á Vesturlandi í Landnámssetrinu í Borgarnesi. Markmiðið er að vinna að sameiginlegum hagsmunamálum fyrirtækja á Vesturlandi, stuðla að því að atvinnustarfsemi þar sé samkeppnishæf og að áframhaldandi vöxtur og fjölbreytileiki atvinnulífsins verði tryggður. Vettvangurinn er opinn félagsmönnum SA og grundvallast m.a. á nýjum áherslum Samtaka atvinnulífsins í atvinnu- og byggðamálum - Hagvöxt um land allt. Samtök atvinnulífsins, Samtök sveitarfélaga á Vesturlandi og Vaxtarsamningur Vesturlands styðja við framtakið.

Mjög góður samhljómur var með fundarmönnum á fundi forystu ríkisstjórnarinnar með fulltrúum aðila á vinnumarkaði og Sambands íslenskra sveitarfélaga í Ráðherrabústaðnum í gær. Á fundinum var farið yfir efnahagsástandið og þróun þeirra mála frá því kjarasamningar voru gerðir í febrúar s.l. og síðan þessir aðilar hittust síðast á samráðsfundi í júlí í fyrra. Þetta kemur fram í Morgunblaðinu í dag. „Það hefur enginn áhuga á því að verðbólga festist hér í sessi. Við höfum áhuga á því að geta staðið við forsendur þeirra kjarasamninga sem gerðir voru í febrúar - það sem snýr að ríkisvaldinu í þeim efnum - og einhugur hér meðal manna að stefna að því að ná hér á ný þeim stöðugleika í efnahagslífinu sem nauðsynlegur er fyrir okkur öll," sagði Geir H. Haarde forsætisráðherra í samtali við Morgunblaðið.

Til að koma Íslandi úr því efnahagsumróti sem nú ríkir er brýnt að stjórnvöld fari út á lánsfjármarkaðinn og klári lántöku sem miðar að því að styrkja gjaldeyrisforða Seðlabanka Íslands, bæta stöðu bankanna og koma þar með Íslandsvélinni af stað aftur. Þetta segir Þór Sigfússon, formaður Samtaka atvinnulífsins, í samtali við Viðskiptablaðið. „Þetta gætu verið um eitt þúsund milljarðar sem þyrftu að koma með þessum hætti inn í kerfið," segir Þór í samtali við blaðið og bætir því við að gangi þetta eftir skapist tækifæri fyrir Seðlabankann til að lækka stýrivexti.

Íslenskur vinnumarkaður er opnari og fjölbreyttari en áður og tækifæri fólks af erlendum uppruna til að láta til sín taka eru betri en áður. Þetta segir Tanya Dimitrova en hún er leikskólastjóri á leikskólanum Berg á Kjalarnesi. Samtök atvinnulífsins ræddu við hana fyrir aðalfund SA í tengslum við útgáfu á ritinu Baráttan um besta fólkið. Til að lýsa reynslu sinni tók hún saman pistil sem nú er hægt að horfa á hér á vef SA. Í pistlinum lýsir hún því hvernig hún sneri baki við kommúnismanum í Búlagaríu árið 1989 og hélt á vit ævintýranna til Íslands. Tanya lýsir því hvað tók við henni hér, leið hennar um vinnumarkaðinn og hvernig hún tókst á við þær áskoranir sem fylgja því að læra íslensku og sækja sér aukna menntun.

Fjölþjóðleg ráðstefna um lífeyriskerfi framtíðarinnar og endurmat norrænu velferðarríkjanna fer fram í Háskólabíói miðvikudaginn 7. maí. Það eru Félagsvísindastofnun Háskóla Íslands, Norrænt öndvegissetur í velferðarrannsóknum (REASSESS), Landssamtök lífeyrissjóða og Tryggingastofnun ríkisins, sem standa að ráðstefnunni. Dagskrá ráðstefnunnar er fjölbreytt en hún stendur frá kl. 9-15:30. Meðal þátttakenda í pallborðsumræðum um hvað þurfi að bæta í íslenska lífeyriskerfinu er Vilhjálmur Egilsson, framkvæmdastjóri SA. Aðgangur er ókeypis, skráning er á netfanginu kolbeinn@hi.is.

Námskeið Samtaka atvinnulífsins um gerð jafnréttisáætlana og framkvæmd þeirra halda áfram í fyrramálið. Nær fullbókað er á námskeiðið en örfá sæti eru þó laus. Um er að ræða vinnustofu þar sem þátttakendur taka virkan þátt en námskeiðin eru sniðin að þörfum þátttakenda hverju sinni og fyrirtækjum þeirra. Námskeiðið er opið félagsmönnum SA og eru áhugasamir beðnir um að skrá sig sem fyrst með því að senda tölvupóst á sa@sa.is.

Á fundi stjórnar SA sem fram fór í morgun var ný framkvæmdastjórn samtakanna kjörin fyrir starfsárið 2008-2009. Bjarni Ármansson gengur úr framkvæmdastjórninni en í hans stað kemur Halldór J. Kristjánsson. Vilmundur Jósefsson var endurkjörinn varaformaður Samtaka atvinnulífsins.

Á fyrsta fundi nýkjörinnar stjórnar Samtaka atvinnulífsins komu fram þungar áhyggjur af stöðu efnahagsmála. Vandi á fjármálamörkuðum, hátt vaxtastig, fyrirsjáanlegur samdráttur í umsvifum og atvinnu, vaxandi verðbólga erlendis, veik staða krónunnar og mikil verðbólga innanlands um þessar mundir vegna gengislækkunar eru þættir sem hafa gríðarleg áhrif á afkomu fyrirtækja og kjör launafólks.  Fyrirsjáanlegt er að aðlögun að breyttum aðstæðum verði erfið og taki tíma. Stjórnin telur afar brýnt að allir aðilar sem áhrif hafa á framvinduna á næstu mánuðum og misserum, þ.e. ríkisstjórn, stjórnarandstaða, sveitarfélög og aðilar á almennum og opinberum vinnumarkaði stilli saman strengi sína með það að markmiði að draga úr verðbólgu og koma í veg fyrir að háar verðbólguvæntingar festist í sessi.

Robert Aliber, prófessor við Chicago háskóla, heldur fyrirlestur í Háskóla Íslands mánudaginn 5. maí. Í fyrirlestrinum mun Aliber kynna ritgerð sem hann hefur nýlokið við um þróun alþjóðafjármála, eignaverðbólur og ójafnvægi í viðskiptum á milli landa. Í ritgerðinni er sérstaklega fjallað um áhrif þessarar þróunar á íslenskt efnahagslíf, sérkenni íslenska hagkerfisins og það hvaða möguleg úrræði íslensk stjórnvöld hafa um þessar mundir.