Efnahags- og skattamál
30.12.2001
Lítið dregið úr áræðni og stórhug margra fyrirtækja
Í áramótaviðtali Morgunblaðsins við Finn Geirsson, formann SA, segir hann m.a. ánægjulegt að sjá að þrátt fyrir ýmis vonbrigði og áföll á liðnu ári hafi lítið dregið úr áræðni og stórhug margra fyrirtækja. Hann segir brýnt að búa svo um hnúta að gengi krónunnar haldist sem stöðugast.
21.12.2001
Víða samdráttur framundan
Samkvæmt nýrri skýrslu Vinnumálastofnunar má vænta umtalsverðs samdráttar í byggingariðnaði og nokkurs samdráttar í iðnaði og verslun, en stöðugleika eða lítilsháttar vaxtar í fjármálaþjónustu og ýmissi annarri þjónustu. Atvinnuleysi fer vaxandi.
13.12.2001
Yfirlýsing ríkisstjórnarinnar vegna samkomulags SA og ASÍ
Ríkisstjórnin hefur sent frá sér yfirlýsingu vegna samkomulags Alþýðusambands Íslands og Samtaka atvinnulífsins.
7.12.2001
Launakönnun KRN fyrir 3. ársjórðung 2001
Dagvinnulaun hækkuðu að meðaltali um 7,6% frá 3. árfsjórðungi 2000 til 3. ársfjórðungs 2001, en vísitala neysluverðs um 8% á sama tíma. Kaupmáttur dagvinnulauna rýrnaði því að meðaltali um 0,3% á þessu tólf mánaða tímabili, en hefur að jafnaði vaxið um 5% á samningstímanum, þ.e. frá ársbyrjun 2000.
6.12.2001
Lægstu launin hækka mest
Kaupmáttur launa á almennum vinnumarkaði hefur vaxið um 5% frá gerð kjarasamninga. Þá hefur gengið eftir það markmið samninganna að þeir lægst launuðu hafa hækkað umfram aðra. Þetta er ótvíræð niðurstaða úrvinnslu á gögnum Kjararannsóknarnefndar.
6.12.2001
Tilraunarinnar virði
Markmið síðustu kjarasamninga hafa haldið betur í verðbólgu undangenginna mánaða en margir óttuðust, segir Ari Edwald, framkvæmdastjóri SA, í leiðara fréttabréfsins Af vettvangi. Mælingar á almennum vinnumarkaði sýna að lægri laun hafa hækkað meira en þau hærri. Það er tilraunarinnar virði að treysta undirstöður þessara samninga og forða því að uppúr slitni með hörmulegum afleiðingum fyrir alla.
21.11.2001
Efla þarf tiltrú á krónuna
Til þess að hemja verðbólguna verður að efla tiltrú á krónuna. Gengisfallið á undanförnum mánuðum virðist vera aðalástæða óhagstæðrar verðlagsþróunar, sagði Finnur Geirsson, formaður SA, í fréttum útvarps.
15.11.2001
Samkomulag um WTO-lotu fagnaðarefni
Samtök atvinnulífsins fagna niðurstöðu ráðherrafundar WTO um að hefja nýja lotu samningaviðræðna um aukið frelsi í alþjóðaviðskiptum. Niðurstaðan eflir tiltrú á fríverslun á alþjóðavettvangi, öllum til hagsbóta.
13.11.2001
Verðbólgan á niðurleið
Hannes G. Sigurðsson, aðstoðarframkvæmdastjóri SA, segir í samtali við Morgunblaðið að verðbólgan sé ótvírætt á niðurleið. Hann bendir á að hækkun á vísitölu neysluverðs nú sé svipuð og á sama tíma í fyrra og að yfirleitt séu litlar breytingar frá nóvember til desember.
9.11.2001
Skref í rétta átt
Vaxtalækkun Seðlabankans er skref í rétta átt, segir Ari Edwald, framkvæmdastjóri SA, í samtali við Morgunblaðið. Hann segist vona að þetta skref sé upphafið að frekari vaxtalækkunum og hvetur jafnframt til aukins aðhalds í opinberum útgjöldum.
7.11.2001
Ný WTO-lota?
SA telja afar mikilvægt að nýrri samningalotu verði ýtt úr vör í Doha. M.a. er lögð áhersla á afnám allra samkeppnistruflandi ríkisstyrkja. Þá telja SA að málefnum vinnumarkaðarins og félagslegum áherslum eigi að halda á þeim vettvangi sem þegar hefur verið skapaður, svo sem ILO.
3.11.2001
Gagnrýni á skattasamræmingu
Átaki OECD gegn „skaðlegri skattasamkeppni“ var líkt við verðsamráð á markaði og „fjárhagslega nýlendustefnu“ á ráðstefnu Hagfræðistofnunar um skattasamkeppni. Þá var skattasamræming sögð óhagkvæm og leiða til hærri skattheimtu.
3.11.2001
Hraða ber einkavæðingu
Hraða ber einkavæðingu hér á landi, einkum á fjármála- og fjarskiptafyrirtækjum, að sögn Michaels Walker hjá Fraser Institute. Hann segir miklar framfarir hafa átt sér stað hér á landi en varar við hækkun opinberra útgjalda.
31.10.2001
Þokkalegar afkomuvæntingar fyrirtækja
Tæp 30% fyrirtækja reikna með versnandi afkomu á næstu mánuðum, en um 20% reikna með að afkoman fari batnandi. Best er hljóðið í fjármála- og sjávarútvegsfyrirtækjum en verst í fyrirtækjum í ferðaþjónustu.
31.10.2001
Ánægja með skattafrumvarp
Tæp 45% fyrirtækja telja að fyrirhugaðar breytingar á skattaumhverfinu muni hafa jákvæð áhrif á afkomu sína, en um 20% telja áhrifin verða neikvæð. Almennust mælist ánægjan meðal fjármálafyrirtækja og í iðnaði.
23.10.2001
Net fríverslunarsamninga
Á vegum EFTA hefur verið gerður fjöldi fríverslunar-samninga sem m.a. ná til sjávarafurða og iðnaðarvara, en eru þó mismunandi að innihaldi. Fyrirtækjum sem eiga viðskipti við viðkomandi ríki er ráðlagt að kynna sér innihald viðkomandi samninga.
17.10.2001
Versnandi efnahagshorfur í Evrópu
Efnahagshorfurnar hafa versnað og lítillar bjartsýni gætir meðal fyrirtækja innan ESB. Þetta eru helstu niðurstöður hálfsárslegrar könnunar Evrópusamtaka atvinnulífsins á efnahagshorfum í álfunni.
17.10.2001
Ísland færist ofar í samkeppnismati
Ísland er í 16. sæti á lista yfir 75 ríki þar sem lagt er mat á samkeppnishæfni þeirra, en var í 23. sæti í fyrra. Listinn er byggður á úttekt Alþjóða efnahagsstofnunarinnar í samvinnu við Harvard-háskóla.
12.10.2001
Samdráttur framundan hjá iðnfyrirtækjum
Samtök iðnaðarins hafa birt niðurstöður könnunar á stöðu og horfum í starfsemi 87 fyrirtækja. Hægt hefur á veltu í flestum greinum, fjárfestingar dregist saman og starfsmönnum fækkað. Framhald verður á þeirri þróun. Sjá nánar á heimasíðu SI.
11.10.2001
Flytja starfsemi til landsins
Í samtali við Fréttablaðið í dag segir Jón Sigurðsson, forstjóri Össurar hf., að fyrirhugaðar skattabreytingar ríkisstjórnarinnar muni vafalaust þýða að Össur hf. muni flytja starfsemi til Íslands.
9.10.2001
Krónan í vegi erlendrar fjárfestingar
Ástæða lítillar erlendrar fjárfestingar hér á landi er vantraust erlendra aðila á íslensku krónuninni. Þetta kom fram í pallborðsumræðum um krónuna, evruna, vexti og verðbólgu, á aðalfundi SF.
9.10.2001
Fríverslun við Mexíkó
Þann 1. október sl. tók gildi fríverslun milli Íslands og Mexíkó, á grundvelli fríverslunarsamnings EFTA ríkjanna við Mexíkó. Hann felur m.a. í sér fulla fríverslun með iðnaðarvörur og bættan aðgang fyrir sjávarafurðir. Sjá nánar á heimasíðu utanríkisráðuneytisins.
9.10.2001
Samneyslan eykst meira en landsframleiðsla
Hlutur samneyslu af vergri landsframleiðslu fer enn vaxandi á næsta ári samkvæmt spá Þjóðhagsstofnunar. Stofnunin spáir að hlutfallið fari í 24,5%, en árið 1991 var það 20,5%.
5.10.2001
8% kaupmáttaraukning á samningstímanum
Laun hafa að jafnaði hækkað um 15% og kaupmáttur þeirra um 8% á yfirstandandi samningstímabili, samkvæmt mælingum Kjararannsóknarnefndar frá 1. ársfjórðungi 2000 til 2. ársfjórðungs 2001.
4.10.2001
75% lægst launaðra hækka umfram lágmark
Laun 71% launafólks hækkuðu umfram lágmarkshækkanir kjarasamninga á tímabilinu frá ársbyrjun 2000 fram á mitt þetta ár. Í hópi þeirra lægst launuðu hækkuðu 75% umfram lágmarkshækkanir kjarasamninga.
4.10.2001
14% hækkun milli fjárlagafrumvarpa
Útgjöld ríkissjóðs hækka um 14% á milli fjárlagafrumvarpa, frá frumvarpi fyrir árið 2001 til frumvarps fyrir árið 2002. Þessi nálgun veitir mun betri vísbendingu um endanlega útkomu en hækkun frá ríkisreikningi fyrir árið 2001 til fjárlagafrumvarps fyrir 2002.
4.10.2001
Gott útspil í skattamálum
Útspil ríkisstjórnarinnar í skattamálum frá því í gær er í heild afar jákvæð niðurstaða fyrir atvinnulífið og góðar fréttir fyrir íslenskt efnahagslíf, segir Ari Edwald, framkvæmdastjóri SA, í leiðara fréttabréfsins Af vettvangi.
3.10.2001
Skattalækkanir boðaðar
Ríkisstjórnin hefur ákveðið að lækka tekjuskatt fyrirtækja í 18%, lækka eignarskatt og stimpilgjöld, afnema verðbólgureikningsskil og heimila fyrirtækjum að færa bókhald og ársreikninga í erlendri mynt. Tryggingagjald mun hins vegar hækka. Sjá nánar á heimasíðu fjármálaráðuneytisins.
26.9.2001
Öll efnahagsleg rök með skattalækkun
Nánast öll efnahagsleg rök mæla með skattalækkun á fyrirtæki, jafnvel myndarlegri skattalækkun, að sögn Bolla Þórs Bollasonar, skrifstofustjóra efnahagsskrifstofu fjármálaráðuneytisins. Í ráðuneytinu hafa veltuáhrif skattalækkana verið til skoðunar.
25.9.2001
3,4% kaupmáttaraukning
Dagvinnulaun hækkuðu að meðaltali um 9,6% á tímabilinu frá öðrum ársfjórðungi 2000 til annars ársfjórðungs 2001. Vísitala neysluverðs hækkaði um 6% á sama tíma og jókst því kaupmáttur dagvinnulauna að meðaltali um 3,4%. Þetta er meðal niðurstaðna launakönnunar Kjararannsóknarnefndar.
13.9.2001
Hægist um hjá eignarleigum
Samkvæmt nýjustu tölum frá Seðlabankanum hefur hægt verulega um í útlánum eignarleiga og er þetta enn ein vísbendingin um viðsnúninginn í efnahagslífinu um þessar mundir.
11.9.2001
67% félagsmanna SI vilja evru
Samkvæmt niðurstöðum skoðanakönnunar sem Gallup vann fyrir Samtök iðnaðarins vilja 67% félagsmanna SI taka upp evru í stað íslensku krónunnar. Þá eru 49,9% þjóðarinnar fylgjandi aðild Íslands að ESB.
6.9.2001
Samtals sjö milljarða tap af rekstri 67 fyrirtækja
Afkoma 67 fyrirtækja, sem fréttir hafa borist af, var mun verri á fyrri helmingi árs en á sama tíma í fyrra. Rúmlega fjögurra milljarða hagnaður snerist í sjö milljarða tap. Arðsemi eigin fjár var tæplega -8% í ár en 5,5% árið 2000. Rekstrarafgangur fyrir fjármagnsliði jókst hins vegar úr 3,8 milljörðum árið 2000 í tæpa sjö milljarða árið 2001.
6.9.2001
Skattalækkun á fyrirtæki tímabær
Að halda til streitu óhagstæðum mun gagnvart öðrum löndum, varðandi t.d. eignarskatt og stimpilgjöld, veikir allt efnahagslífið og tekjugrundvöll ríkisins til framtíðar, segir Ari Edwald, framkvæmdastjóri SA, í leiðara fréttabréfsins Af vettvangi.
30.8.2001
Fjármálaráðuneytið: brýnt að lækka vexti og skatta á atvinnulífið
Það er mat fjármálaráðuneytisins að fremur sé ástæða til að óttast samdrátt í efnahagslífinu en ofþenslu. Því beri að bæta rekstrarskilyrði atvinnulífsins og brýnt sé að lækka vexti og lækka skatta á atvinnulífið.
29.8.2001
Tími óbreyttrar vaxtastefnu er liðinn
Sú ofþensla sem kallaði á vaxtahækkanir Seðlabankans á sínum tíma er ekki lengur fyrir hendi. Tími óbreyttrar vaxtastefnu er liðinn, sagði Ari Edwald, framkvæmdastjóri SA, í erindi um vaxtamálin.
23.8.2001
Skattasamkeppni: tækifæri fyrir Ísland?
Svo hljóðar yfirskrift ráðstefnu sem Hagfræðistofnun HÍ skipuleggur og haldin verður í Reykjavík 2. nóvember nk., með stuðningi SA o.fl. Meðal þátttakenda verða Davíð Oddsson forsætisráðherra og Valgerður Sverrisdóttir iðnaðar- og viðskiptaráðherra, auk fjölda innlendra og erlendra sérfræðinga. Sjá nánar á heimasíðu Hagfræðistofnunar HÍ.
15.8.2001
Skýrsla frá OECD um hagvöxt
Út er komin lokaskýrsla frá OECD um hagvöxt sem ber heitið "The New Economy: Beyond the Hype". Sjá nánar.
2.8.2001
Vaxtalækkun strax
Samtök atvinnulífsins hafa margítrekað þá skoðun að við þessar aðstæður væri rétt að lækka vexti myndarlega. Styrking krónunnar síðustu daga bendir til að gengisvæntingar séu að breytast og menn telji að botninum sé náð, segir Ari Edwald, framkvæmdastjóri SA, í leiðara fréttabréfs SA.
31.7.2001
Hægari útlánavöxtur
Á fyrstu sex mánuðum þessa árs lækkuðu skuldir innlendra aðila tengdar erlendri mynt um hálfan milljarð króna, en jukust um 100 milljarða króna í fyrra. Þá hægði verulega á verðtryggðum og óverðtryggðum útlánum. Þessi þróun er sterk vísbending um að hægja taki á efnahagsstarfseminni í landinu á næstunni.
20.7.2001
Laun hækkuðu um 0,8% í júní
Samkvæmt launavísitölu Hagstofunnar hækkuðu laun á Íslandi að meðaltali um 0,8% í júní. Kaupmáttur launa hefur að meðaltali aukist um 25,1% frá árinu 1995.
13.7.2001
Ísland sker sig úr
Laun og kaupmáttur launa hækkuðu margfalt meira hérlendis en í samanburðarlöndunum
frá 1. ársfjórðungi 2000 til 1. ársfjórðungs 2001. Á súluriti sést mjög
greinilega hvernig Ísland hefur skorið sig úr á þessum sviðum.
6.7.2001
Minnkandi munur atvinnutekna
Tekjumunur atvinnutekna hefur farið minnkandi frá árinu 1995, samkvæmt yfirliti Þjóðhagsstofnunar. Lítið atvinnuleysi er líklega helsta skýringin.
5.7.2001
Auka þarf tiltrú á atvinnulífið
„Það sem mestu skiptir nú er að treysta tiltrú á atvinnulífið og sporna gegn því að samdráttur verði of mikill“, segir í ályktun stjórnar Samtaka atvinnulífsins frá því í dag. Til mótvægis við þá þróun hvetja Samtök atvinnulífsins til vaxtalækkana, skattalækkana á fyrirtæki, að einkavæðingu verði hraðað og að fyrirtæki og opinberir aðilar sýni ítrasta aðhald í verðlagsmálum.
5.7.2001
Framleiðni vex – en kaupmáttur hefur vaxið hraðar undanfarin ár
Frá 1995-2000 jókst kaupmáttur á vinnustund um tæplega 19%, á meðan afköstin jukust aðeins um rúm 10%. Ef þensluskeiðinu er að ljúka, eins og margir telja, er líklegt að draga muni úr framleiðni fyrst um sinn, því að í fyrirtækjunum verður þá fjármagn og vinnuafl sem ekki nýtist að fullu.
19.6.2001
Viðbrögð landsmanna ráða úrslitum
Líkurnar eru fremur í þá átt að hagvöxtur gæti orðið enn minni en spá Þjóðhagsstofnunar gerir ráð fyrir, segir Hannes G. Sigurðsson, aðstoðarframkvæmdastjóri SA. Viðbrögð landsmanna ráða úrslitum um framvinduna í verðbólgu- og gengismálum.
12.6.2001
Kaupmáttur eykst um 9,4% milli ára
Samkvæmt niðurstöðum launakönnunar Kjararannsóknarnefndar jókst kaupmáttur dagvinnulauna að meðaltali um 9,4% á tímabilinu frá 1. ársfjórðungi 2000 til 1. ársfjórðungs 2001.
7.6.2001
Skuldir borgarinnar aukast
Peningaleg staða á samstæðureikningi Reykjavíkurborgar var neikvæð um 40 milljarða króna í árslok 2000. Staðan hafði versnað úr mínus 32 milljörðum í lok árs 1999, og hefur versnað jafnt og þétt allar götur frá árinu 1992 þegar hún var síðast jákvæð. Í fjárhagsáætlun er gert ráð fyrir að skuldastaðan versni enn á árinu sem er að líða.
1.6.2001
„Verjum skattaforskotið með oddi og egg“
Á aðalfundi SA fjallaði framkvæmdastjóri Samtaka atvinnulífsins á Írlandi m.a. um mikilvægi samkeppnishæfs skattaumhverfis fyrir írska hagkerfið. Hann segir félaga Íra í ESB ekki taka því of fagnandi en bætir því við að Írar muni verja forskot sitt með oddi og egg. Erindið er nú komið á vef SA í íslenskri þýðingu.
28.5.2001
Áhersla á efnahagslega sjálfbæra þróun
Framkvæmdastjórn ESB leggur of mikla áherslu á vistfræðilegar og félagslegar hliðar sjálfbærrar þróunar, á kostnað þeirrar efnahagslegu, segir í gagnrýni UNICE. Þá geta einhliða verndunaraðgerðir ESB dregið úr samkeppnishæfni fyrirtækja og þar með getu þeirra til að leggja sitt af mörkum.
21.5.2001
Aukin menntun, aukin framleiðsla
Samkvæmt skýrslu OECD frá desember 2000 um horfur í efnahagsmálum, eru langtímaáhrif af einu viðbótarári í menntun um 4-7% aukning í framleiðslu á mann. Þetta kom fram í erindi Ara Edwald á félagsfundi Menntar.
17.5.2001
Bush gegn eftirliti OECD með skattareglum
Í fjr.is, vefriti fjármálaráðuneytisins, er greint frá því að Bandaríkjamenn styðji ekki aðgerðir OECD sem feli í sér fyrirmæli um það hvernig sjálfstæð ríki byggi upp eigið skattkerfi, en stofnunin hefur verið með átak gegn því sem hún nefnir „skaðlega skattasamkeppni.“ Sjá vefrit fjármálaráðuneytisins.
15.5.2001
15% tekjuskattshlutfall fyrirtækja
Megintillögum skýrslu skattahóps SA má skipta í þrennt: lækkun tekjuskattsprósentu fyrirtækja í 15%, afnám eignarskatta og afnám stimpilgjalda af útgáfu og viðskiptum með viðskiptabréf, sagði Guðjón Rúnarsson, formaður skattahóps SA í erindi sínu á aðalfundi SA. Sjá erindi Guðjóns.
15.5.2001
Góður vilji til breytinga á skattheimtu
„Ljóst er að góður vilji stendur til þess hjá báðum stjórnarflokkunum að vinna að breytingum á skattheimtu, sem eru til þess fallnar að auka hér umsvif og tryggja að forsendur fyrirtækjareksturs séu upp á það allra besta hér á landi. Dæmin sanna að heildartekjur ríkissjóðs þurfa ekki að lækka þótt skattareglurnar séu gerðar sanngjarnari", sagði Davíð Oddsson, forsætisráðherra, m.a. í ávarpi sínu á aðalfundi SA. Sjá erindi forsætisráðherra.
11.5.2001
Of háir skattar á Norðurlöndunum
Norðurlöndin verða að lækka skatta líkt og önnur Evrópuríki. Annars verða þau undir í samkeppninni um fjárfestingar, hagkerfi þeirra munu staðna, svarta hagkerfið blómstra og skattstofninn rýrna. Þetta kemur fram í riti Samtaka atvinnulífsins í Noregi um skattamál.
8.5.2001
Samneysla vaxandi hlutfall af landsframleiðslu
Samkvæmt spá Þjóðhagsstofnunar verður hlutur samneyslu í landsframleiðslu 24,3% árinu og eykst þannig úr 21,5% árið 1997. Á sama tíma hefur hlutur samneyslu farið minnkandi í öðrum ríkjum OECD. Laun eru stærsti hluti samneyslunnar og hafa ríki og sveitarfélög haft forystu í launahækkunum undanfarin ár.
8.5.2001
ASÍ og SA funda um efnahagsástandið
Alþýðusamband Íslands og Samtök atvinnulífsins munu á næstu dögum fara yfir
stöðu og þróun efnhagsmála til að meta hvort, og þá með hvaða hætti, megi
treysta þann stöðugleika sem stefnt var að með kjarasamningum á almennum vinnumarkaði. Þetta var niðurstaða fundar fulltrúa ASÍ og SA um efnahagsástandið, sem haldinn var í
gær, 7. maí.
3.5.2001
Afnám stimpilgjalda
Innheimta stimpilgjalda hefur á undanförnum árum verið á hröðu undanhaldi hjá öðrum ríkjum, en gjöldin geta leitt til tvísköttunar og jafnvel margsköttunar. Íslensk fyrirtæki starfa nú í alþjóðlegu umhverfi og afar mikilvægt er að þau sæti ekki sérstökum samkeppnishindrunum. Hlutfall stimpilgjalda af heildarskatttekjum ríkissjóðs hefur farið lækkandi á síðustu árum og Samtök atvinnulífsins leggja til að þau verði afnumin, enda um úrelta skattheimtu að ræða og alvarlega samkeppnishindrun hvað snertir útgáfu og viðskipti með viðskiptabréf.
3.5.2001
Lítill þjóðhagslegur sparnaður
Innlendur sparnaður hefur farið hraðminnkandi undanfarin tvö ár. Árið 2000 var hreinn sparnaður landsmanna innan við hálft prósent af landsframleiðslu, en á árunum 1990-1998 var hlutfallið oftast nær á bilinu 3-5%. Þetta gerist þrátt fyrir að frjáls lífeyrissparnaður hafi stóraukist á liðnu ári.
3.5.2001
Órói á gjaldeyrismarkaði
Mikilvægast nú er að endurvekja trú á íslenskt efnahagslíf, en þá fara markaðsaðilar á ný að taka stöðu með krónunni, segir Hannes G. Sigurðsson, aðstoðarframkvæmdastjóri SA, í leiðara fréttabréfsins Af vettvangi. Finna þarf lausn á sjómannadeilunni, en það hefði mikil áhrif til skamms tíma. Þá er mikilvægt að metnaðarfullum áformum stjórnvalda um einkavæðingu verði hraðað eins og kostur er og að niðurstaða fáist fljótt í samningum Norðuráls og stjórnvalda. Síðast en ekki síst skiptir miklu máli að stjórnvöld kynni með skýrum hætti áform sín um aðgerðir til að bæta starfsskilyrði íslensk atvinnulífs, einkum á sviði skattamála.
11.4.2001
Fjármálaráðuneytið: tímabært að lækka fyrirtækjaskatta
Fjármálaráðuneytið er sammála því mati OECD að tímabært sé að huga að lækkun fyrirtækjaskatta með það að meginmarkmiði að styrkja stöðu atvinnulífsins og þannig stuðla að auknum hagvexti. Þetta kemur fram í nýjasta tölublaði fjr.is, vefriti ráðuneytisins. Sjá nánar fréttabréf fjármálaráðuneytisins (pdf-snið).
5.4.2001
Stækkun Norðuráls
Þörf er á aukinni erlendri fjárfestingu inn í landið og því brýnt að íslensk stjórnvöld taki afstöðu til óska Norðuráls um stækkun, en fyrirtækið hefur þegar sýnt frumkvæði í því að byggja upp íslenskt atvinnulíf, segir Ari Edwald, framkvæmdastjóri SA, í leiðara Af vettvangi.
5.4.2001
Tækifæri framundan
Hægt hefur á í efnahagslífinu og nú er tími ákvarðana sem skjóta munu stoðum undir væntingar um aukna arðsemi í atvinnulífinu í framtíðinni og tiltrú á efnahagslífið, svo sem skattalækkanir á fyrirtæki og frekari vaxtalækkanir þegar líða tekur á árið, segir Ari Edwald, framkvæmdastjóri SA, í leiðara Af vettvangi.
5.4.2001
Vaxandi skattbyrði fyrirtækja
Í umræðum á opinberum vettvangi er því gjarnan haldið fram að skattar hafi verið lækkaðir á fyrirtæki á undanförnum árum. Þvert á móti má hins vegar sýna fram á að raunvirði tekjuskatts á fyrirtæki hafi hækkað á síðasta áratug, þrátt fyrir að skatthlutfallið hafi lækkað úr 50% í 30%. Ástæðurnar er einkum að rekja til minnkandi verðbólgu og breikkunar skattstofnsins með lækkun og afnámi frádráttarheimilda.
5.4.2001
Nálægt 40% leggja aukaframlag í lífeyrissjóð
Hlutfall launþega sem leggja viðbótarsparnað í lífeyrissjóð virðist orðið nálægt 40%. Þetta er meiri þátttaka en gert var ráð fyrir við undirritun kjarasamninga í vor, sem þýðir hærri launakostnað fyrirtækja af mótframlagi en reiknað var með.
30.3.2001
Vaxtalækkun fagnað
Samtök atvinnulífsins fagna ákvörðun Seðlabankans um að lækka vexti og telja að sú ákvörðun hafi verið orðin tímabær, segir Hannes G. Sigurðsson, aðstoðar-framkvæmdastjóri SA, í viðtali við Morgunblaðið. Þá segir hann gengislækkanir undanfarinna daga ekki vera af efnahagslegum ástæðum.
16.3.2001
Hætta á harðri lendingu efnahagslífsins
Hátt gengi, há laun og háir vextir vega að samkeppnisstöðu íslenskra fyrirtækja, segir í ályktun iðnþings Samtaka iðnaðarins. Varað er við hættu á harðri lendingu efnahagslífsins, bíði stjórnvöld of lengi með vaxta- og skattalækkanir.
2.3.2001
Helmings hækkun kaupmáttar
Sé lágmarkstekjutryggingin notuð sem mælikvarði á lágmarkslaun hefur kaupmáttur þeirra hækkað um helming á hálfum áratug.
1.3.2001
Hagnaður fyrirtækja þriðjungur fyrra árs
Hagnaður tuttugu og fjögurra fyrirtækja sem birt hafa uppgjör á Verðbréfaþingi var samtals um 3 milljarðar árið 2000, af reglulegri starfsemi fyrir skatta. Árið á undan var hagnaður sömu fyrirtækja rúmir 9 milljarðar og fellur hagnaðurinn úr 10% af veltu í 3%.
1.3.2001
Kaupmáttur lágmarkslauna aldrei hærri
Kaupmáttur lágmarkslauna hefur aldrei verið hærri en um þessar mundir og hefur hann vaxið um þriðjung frá miðjum síðasta áratug. Miðað við fyrirliggjandi verðbólguspá Seðlabankans mun kaupmáttur lágmarkslauna halda áfram að vaxa og verða 42% hærri á árinu 2002 en um miðjan síðasta áratug.
1.2.2001
Vaxtalækkun í kortunum
Hvergi í sambærilegum löndum eru vextir eins háir og hér á landi og fer vaxtamunurinn hratt vaxandi. Í ljósi þeirrar þróunar, tafa á áhrifum vaxtalækkunar og þess hve skammt er enn liðið frá síðustu vaxtahækkun verður að teljast varfærið að lækka forvexti um 0,5 prósentustig. Það væri skref í rétta átt, segir Ari Edwald, framkvæmdastjóri SA í leiðara fréttabréfsins Af vettvangi. 
Sjá nánar
1.1.2001
Nýtum tækifærið
Finnur Geirsson, formaður Samtaka atvinnulífsins, segir í áramótagrein sinni í Morgunblaðinu að framundan sé ómetanlegt tækifæri fyrir fyrirtækin í landinu, stjórnvöld og launafólk að tryggja framhald stöðugleikans, efla samkeppnisstöðu Íslands og treysta grunn sífellt betri lífskjara. Við höfum ekki efni á að sleppa því tækifæri. Sjá nánar
Leit
Stjórnborð
Fánar
