Fréttir

Seðlabankinn getur ekki brugðist við versnandi verðbólguhorfum og vaxandi verðbólguvæntingum með öðrum hætti en að hækka stýrivexti, segir Hannes G. Sigurðsson, aðstoðarframkvæmdastjóri SA, í samtali við Morgunblaðið. Hann segir ljóst að raungengi krónunnar sé í sögulegu hámarki og að stór hluti fyrirtækja hafi ekki rekstrargrundvöll við þessar aðstæður. Seðlabankinn sé afskaplega einn á báti í baráttunni gegn verðbólgu og stýrivaxtastefna bankans sé komin í öngstræti.

Hreinn ávinningur: Hvaða valkostir eru í boði í umhverfisvottun á Íslandi? er heitið á nýju kynningarriti þar sem er að finna yfirlit yfir þær umhverfisvottanir sem íslensk fyrirtæki hafa aðgang að og byggja á óháðri úttekt þriðja aðila. Ýmist er um að ræða vottun á vöru, þjónustu eða stjórnun, en yfirleitt eru þó ekki skörp skil þar á milli. Ritið er gefið út í tengslum við ráðstefnuna, „Hreinn ávinningur – Hvað er að græða á umhverfisstarfi fyrirtækja?” Útgefendur eru Samtök atvinnulífsins, Umhverfisfræðsluráð, Alþýðusamband Íslands og Samtök iðnaðarins.  Sjá kynningarritið

Það er tímabært og gríðarlega mikilvægt að endurskoða eftirlitskerfi hins opinbera og leyfisveitingar frá grunni. Í dag er þetta kerfi allt of flókið og íþyngjandi og of dýrt í framkvæmd. Þetta sagði Ari Edwald, framkvæmdastjóri SA, í setningarávarpi ráðstefnunnar Hreinn ávinningur, þar sem fjallað var um hvað fyrirtæki geta grætt af umhverfisstarfi. Sigríður Anna Þórðardóttir, umhverfisráðherra, sagði ráðuneytið vera markvisst að fara í gegnum eftirlitskerfi á þess vegum og að fljótlega yrðu kynntir áfangar í því starfi.

Hreinn ávinningur – hvernig græða fyrirtæki á umhverfisstarfi? er yfirskrift ráðstefnu sem haldin verður á Grand Hótel miðvikudaginn 28. september nk., kl. 8:30-13:00. Þar munu m.a. fulltrúar fjölda fyrirtækja fjalla um umhverfisstjórnun, þýðingu umhverfisstarfs fyrir ímynd fyrirtækja, menningu og samkeppnishæfni og um fjárhagslegan ávinning fyrirtækja af umhverfisstarfi. Umhverfisráðherra flytur lokarorð. Að ráðstefnunni standa SA, SI, Umhverfisfræðsluráð og ASÍ.

Í samtali við Morgunblaðið segir Ari Edwald, framkvæmdastjóri Samtaka atvinnulífisins, að hann telji rétt að afnema þegar í stað takmarkanir á frjálsri för fólks frá tíu aðildarríkjum ESB. Ríkin gerðust aðilar að ESB og EES þann 1. maí 2004 og að óbreyttu rennur út frestun á frjálsri för fólks frá þessum ríkjum þann 1. maí 2006. „Í ljósi aðstæðna sem nú blasa við, að ekkert er í spilunum um að spennuástand í samfélaginu breytist fram til 1. maí 2006 þegar frestuninni lýkur, sé ég engin efnisleg rök sem mæla með því að frestuninni sé við haldið,“ segir Ari.

Þegar tíu ný ríki gerðust aðilar að ESB og EES 1. maí 2004 tóku flest fyrri aðildarríki upp tímabundnar takmarkanir á frjálsri för fólks frá flestum nýju aðildarríkjanna. Hér á Íslandi hafa gilt mun strangari reglur en í Danmörku, Noregi og Svíþjóð, sem setti engar takmarkanir. Ný skýrsla norrænu ráðherranefndarinnar sýnir að nýir EES-borgarar hafa komið til allra Norðurlandanna vegna atvinnu, langmest til Noregs, og alls staðar haft jákvæð áhrif á vinnumarkað og efnahagslíf. Strangar reglur hafa m.a. aukið eftirspurn eftir þjónustusamningum við fyrirtæki í nýju aðildarríkjunum.

Samræmd vísitala neysluverðs í EES-ríkjum hækkaði um 0,3% frá júlí til ágúst sl. Á sama tíma lækkaði vísitalan fyrir Ísland um 0,2% frá fyrra mánuði. Frá ágúst 2004 til jafnlengdar árið 2005 var verðbólgan, mæld með samræmdri vísitölu neysluverðs, 2,2% að meðaltali í ríkjum EES. Lægst var hún á Íslandi, 0,4%, en 1,0% í Svíþjóð og Finnlandi. Mest mældist verðbólgan í Lettlandi, 6,3% og í Lúxemborg, 4,3%. Sjá nánar á vef Hagstofunnar.

Jafnréttisráð lýsir eftir tilnefningum til jafnréttisviðurkenningar fyrir árið 2005. Viðurkenningu geta hlotið einstaklingar, hópar, fyrirtæki eða félagasamtök, sem á einn eða annan hátt hafa skarað fram úr eða markað spor á sviði jafnréttismála. Tilgangurinn er að verðlauna fyrir vel unnin störf í þágu jafnréttis kvenna og karla og hvetja um leið til frekari dáða. Tilnefningum skal skilað eigi síðar en 25. september nk. Sjá nánar á vefsíðu Jafnréttisráðs.

Evrópsk vinnuverndarvika verður haldin dagana 24. til 28. október nk. og fjallar að þessu sinni um hávaða á vinnustöðum. Markmiðið er að vekja athygli á skaðlegum áhrifum hávaða á vinnustöðum í þeim tilgangi að gera vinnustaðina heilsusamlegri og öruggari. Leitað er eftir dæmum af vinnustöðum sem hafa náð góðum árangri í að draga úr eða koma í veg fyrir hávaða og verða viðurkenningar veittar vinnustöðum, sem þykja skara fram úr á þessu sviði. Sjá nánar á vef Vinnueftirlitsins.

Í ágústmánuði sl. voru skráðir 65.550 atvinnuleysisdagar á landinu öllu sem jafngilda því að 2.851 manns hafi að meðaltali verið á atvinnuleysisskrá í mánuðinum. Þessar tölur jafngilda 1,8% atvinnuleysi. Til samanburðar mældist atvinnuleysið 2,0% í júlí sl. og 2,9% í ágúst 2004. Vinnumálastofnun gerir ráð fyrir að atvinnuleysi minnki enn í september og geti farið niður í allt að 1,6%, eða lægsta hlutfall á þessum árstíma síðan á árunum 1999 til 2001. Sjá nánar á vef Vinnumálastofnunar.

Staðlaráð Íslands stendur fyrir námskeiði um ISO 9000 gæðastjórnunarstaðlana, fimmtudaginn 22. september. Yfirskrift þess er Lykilatriði, uppbygging og notkun og er það ætlað þeim sem vilja læra á ISO 9000 gæðastjórnunarstaðlanna. Markmið námskeiðsins er að þátttakendur geti gert grein fyrir megináherslum og uppbyggingu kjarnastaðlanna í ISO 9000:2000 röðinni og þekki hvernig þeim er beitt við að koma á og viðhalda gæðastjórnunarkerfi. Sjá nánar á vef Staðlaráðs Íslands þar sem einnig er hægt að skrá sig.

Vefur Samtaka atvinnulífsins hefur tekið nokkrum breytingum. Einkum er um að ræða útlitsbreytingar þótt byggt sé á gömlum grunni. Notendur vefsins eiga því ekki að verða í vandræðum með að finna sínar síður og þá eiga allir hlekkir (linkar) af eldri vefnum að haldast. Auk útlitsbreytinga má nefna möguleikana á að stækka og minnka letur (valstika ofarlega til vinstri) og innan tíðar verður jafnframt hægt að nálgast eldri fréttir eftir málefnaflokkum.

Hjá Vinnueftirliti ríkisins er nú í undirbúningi ný reglugerð sem koma á í stað reglna um hávaðavarnir á vinnustöðum og heyrnareftirlit starfsmanna (nr. 500/1994). Reglurnar byggja á tilskipun Evrópusambandsins nr. 2003/10/EB.  Fjallað er um viðmiðunarmörk fyrir hávaða á vinnustöðum, áhættumat, forvarnir, heyrnarhlífar, heyrnarmælingar, upplýsingar og þjálfun starfsmanna.  Þeir sem óska eftir að kynna sér málið nánar eða koma á framfæri ábendingum eða athugasemdum geta haft samband við Pétur Reimarsson hjá SA.

Samtök atvinnurekenda á Norðurlöndum hafa búið til sameiginlega uppskrift að því hvernig Norðurlöndin geti tryggt áframhaldandi velgengni sína á heimsvísu. Uppskriftin er birt í skýrslunni The Nordic recipe for global success. Skýrslan fjallar um það hvernig Norðurlöndin geti brugðist við sífellt harðnandi alþjóðlegri samkeppni og í henni kemur fram að Norðurlandaþjóðirnar verði að sækja í sig veðrið, með því að bæta starfsumhverfi atvinnulífsins og efla menntun fólks enn frekar, ef takast eigi að tryggja velferð þjóðanna til framtíðar.

Samtök atvinnulífsins fagna þeirri ákvörðun ríkisstjórnarinnar að ráðstafa 2,5 milljörðum króna af söluandvirði Símans til þess að efla Nýsköpunarsjóð atvinnulífsins. SA hafa lengi lagt áherslu á mikilvægi þess að efla nýsköpunarstarf í íslensku atvinnulífi en dæmin sýna að það fé sem lagt er til rannsókna og nýsköpunar fyrirtækja skilar sér oft margfalt til baka á örfáum árum í verðmætasköpun, nýjum störfum og þar með sköttum og gjöldum til þjóðfélagsins. Sjá umfjöllun um rannsóknir og nýsköpun í Áherslum atvinnulífsins sem gefnar voru út í maí sl.

Raungengi krónunnar á mælikvarða verðlags er um þessar mundir hærra en nokkru sinni og er samkeppnisstaða íslenskra fyrirtækja verri en hún hefur verið frá upphafi þessara mælinga. Hannes G. Sigurðsson, aðstoðar-framkvæmdastjóri SA, segir í leiðara fréttabréfsins Af vettvangi að því fari fjarri að hagkerfið geti staðið undir núverandi gengi krónunnar. Gríðarlegur viðskiptahalli beri því órækt vitni. Hagnaður atvinnulífsins í heild hafi farið minnkandi samhliða hækkandi raungengi. Vissulega finnist ánægjulegar undantekningar í Kauphöllinni, en sá hagnaður eigi að stórum hluta rætur að rekja til starfsemi erlendis.

Sífellt fjölgar lagabálkum þar sem opinberum aðilum er veitt heimild til innheimtu þjónustugjalda og eru slíkar heimildir nú líklega um 100 talsins. Oft virðast engar takmarkanir á þeim kostnaði sem unnt er að velta út í gjaldskrár þeirra  og jafnvel ekkert aðhald með því að hagkvæmni og sparnaðar sé gætt. Það er löngu tímabært að settar séu reglur um álagningu og innheimtu þjónustugjalda opinberra aðila ásamt því að rökstuðningur fylgi gjaldskrám þeirra. Eðlilegast væri að láta aðila á markaði veita þjónustuna, sem opinberir aðilar hafa nú á sinni könnu, í meirihluta tilvika.

Hugmyndir um upptöku opinberra neysluviðmiða við ákvörðun bótafjárhæða hafa verið í umræðunni á Íslandi um nokkurt skeið, m.a. á Alþingi og hjá stjórnvöldum. Hugmyndirnar ganga út á að flytja ábyrgðina á ákvörðun bóta yfir á „vísindalegar“ mælingar á neyslu fólks og miða síður að því að tryggja ákveðin lífsgæði. Í Svíþjóð hefur verið gengið einna lengst í að tengja bætur við neyslu, en hugmyndirnar sem hér hafa verið til umræðu ganga mun lengra.