Arðgreiðslur hluti af heilbrigðu atvinnulífi

Þorsteinn Víglundsson, framkvæmdastjóri SA, var gestur í Bítinu á Bylgjunni í upphafi vikunnar þar sem arðgreiðslur og traust til stjórnenda fyrirtækja voru til umræðu. Þorsteinn benti á að arðgreiðslur væru hluti af heilbrigðu atvinnulífi en umræða um atvinnulífið væri mun neikvæðari á Íslandi en í nágrannalöndum okkar. Vel rökstudd gagnrýni eigi alltaf rétt á sér en almennt sé of mikil neikvæðni í garð fyrirtækja og of lítill skilningur á mikilvægi þeirra.

„Ég held að við búum við það enn eftir hrunið að umræða um atvinnulífið er yfirgengilega neikvæð og stjórnmálin hafa t.d. verið afar neikvæð í garð atvinnulífsins. Það hefur allt og lítið verið rætt um það að heilbrigt og öflugt atvinnulíf er undirstaða velferðar okkar,“ sagði Þorsteinn og benti á að fyrirtæki bjóði fólki störf, skapi verðmæti og afli ríkissjóði tekna. „Þannig byggjum við upp öflugt og gott samfélag.“

Varðandi gagnrýni á launaþróun stjórnenda í opinberri umræðu benti Þorsteinn á að frá 2005 og til dagsins í dag þá hafi þeir hækkað hlutfallslega mun minna en aðrir og munur á hæstu og lægstu launum sé minni hér en á Norðurlöndunum. Laun á vinnumarkaði hafi hækkað umtalsvert að undanförnu og kaupmáttur sömuleiðis. Góðir tímar séu framundan en raunveruleg hætta sé á ofhitnun í hagkerfinu.

„Það eru mörg hættumerki. Við sjáum að innlend verðbólga er meiri en heildarverðbólgan sem við erum að mæla þar sem lækkandi olíuverð og styrking krónunnar heldur henni niðri. Innlendir þjónustuliðir hækkuðu um 4-5% á síðasta ári þannig að það kraumar hér verðbólga undir niðri. Við þurfum að gæta okkar,“ sagði framkvæmdastjóri SA en það eru líka jákvæð teikn á lofti.

„Þegar við skoðum heildarmyndina er hagkerfið okkar mun heilbrigðara en fyrir áratug síðan.“ Hagvöxtur byggist á auknum útflutningstekjum og það er mikill uppgangur í ferðaþjónustu og í útflutningi í iðnaði. Rekstur fyrirtækjanna er einnig heilbrigðari en fyrir áratug síðan og agaðri. „Það er miklu meiri innistæða fyrir því sem er verið að gera.“

Mælingar á trausti fólks til atvinnulífsins sýna að fólk treystir eigin vinnuveitanda mjög vel en treystir síður stjórnendum í atvinnulífinu. „Þarna er um talsvert vantraust að ræða en þar sem fólk þekkir best til virðist traustið vera fyrir hendi,“ segir Þorsteinn en fólk treystir eigin vinnuveitanda álíka vel og lögreglunni og landhelgisgæslunni.

Þorsteinn bendir á að Íslandi séu fyrirtæki almennt minni en gengur og gerist í nágrannalöndum okkar og samskipti stjórnenda og starfsfólks yfirleitt góð. Reyndar sýnir könnun frá haustinu 2013 að rúmlega 94% Íslendinga eru jákvæðir í garð lítilla fyrirtækja en þau greiða nærri helming launa á Íslandi og því umtalsvert efnahagslegt afl.

Þorsteinn segir að það sé kannski ekki að undra að umræðan um atvinnulífið hafi verið neikvæð eftir það sem gekk á á árunum 2007-2009. „Ég held að við eigum eftir að vinna úr þessu vantrausti,“ segir framkvæmdastjóri SA en kröfur um góða stjórnarhætti í atvinnulífinu og aukið gagnsæi hafi bætt atvinnulífið. Þó sé hægt að gera betur. Hann gagnrýnir tryggingarfélögin fyrir að hafa ekki upplýst um forsendur arðgreiðslna sem þau ákváðu nýverið en lækkuðu eftir harða gagnrýni almennings og fjölmiðla. Í raun hafi breytingar á evrópskum reglum falið í sér takörkun á getu fyrirtækjanna til að greiða arð vegna aukinna krafna um hækkun á eigin fé en ekki öfugt.

Hægt er að hlusta á viðtalið í heild á vef Vísis.

Smelltu til að hlusta