Vilmundur Jósefsson gefur áfram kost á sér sem formaður Samtaka atvinnulífsins (1)

Formaður Samtaka atvinnulífsins, Vilmundur Jósefsson, hefur ákveðið að gefa áfram kost á sér sem formaður SA. Kosning formanns fer fram með rafrænum hætti meðal aðildarfyrirtækja SA í aðdraganda aðalfundar samtakanna sem fer fram á síðasta degi vetrar, miðvikudaginn 18. apríl 2012 á Hótel Nordica.
Vilmundur Jósefsson á aðalfundi SA 2011

Dagskrá aðalfundar SA 2012 verður kynnt þegar nær dregur en yfirskrift fundarins er Uppfærum Ísland. Venjuleg aðalfundarstörf hefjast kl. 13 (í sal H á 2. hæð) en opin dagskrá hefst kl. 14 í aðalsal Nordica og stendur til kl. 16:00.

 

Vilmundur Jósefsson hefur verið formaður SA frá árinu 2009 en áður var hann varaformaður samtakanna um þriggja ára skeið. Vilmundur hefur setið í stjórn SA um árabil en hann var formaður Samtaka iðnaðarins árin 2000-2006 og var stjórnarmaður í SI 1994-2000. Vilmundur er viðskiptafræðingur frá H.Í.