Verðbólgan undir markmið á ný í fyrsta sinn í tvö og hálft ár

Verðlag hækkaði um 0,67% í febrúar sl. og var hækkunin í takti við spá greiningaraðila. Ársverðbólgan mælist nú 2,1% og er því komin undir 2,5% verðbólgumarkmið Seðlabankans í fyrsta skipti í tvö og hálft ár.

 

Heimild: Hagstofan

 

Almennt er mánaðartakturinn hár í febrúar vegna áhrifa útsöluloka en að þessu sinni eru áhrifin metin ríflega 0,40% til hækkunar verðlags sem er heldur minni áhrif en á sama tíma í fyrra. Að undanskildum útsöluáhrifum voru flugsamgöngur, eldsneyti og menning þeir undirliðir sem hækkuðu mest. Aðrir undirliðir verðbólgunnar stóðu nánast í stað eða lækkuðu lítillega.

Smelltu til að stækka
 

Heimild: Hagstofan

 

Góðar horfur á árinu 2014 ef krónan helst stöðug
Krónan var að meðaltali 12% sterkari í febrúar 2014 en á sama tíma í fyrra. Í febrúarmælingu Hagstofunnar eru sterk gengisáhrif, innfluttir liðir eins og matvörur og ný ökutæki lækkuðu í verði. Að öðru óbreyttu má ætla að frekari gengisáhrif eigi eftir að koma fram á komandi mánuðum. Horfurnar eru almennt góðar að mati greiningaraðila og gerir Seðlabankinn ráð fyrir í nýrri spá bankans sem birtist í febrúarmánuði að verðbólgan víki ekki langt frá verðbólgumarkmiði á árinu 2014. Allar spár greiningaraðila ganga hins vegar út frá því að gengið verði stöðugt, gefi krónan verulega eftir frá núverandi gildi geta horfurnar fljótt breyst til hins verra.

Smelltu til að stækka

Heimild: Seðlabankinn