Raunstýrivextir hærri hérlendis

Undanfarna daga hafa evrópski og norski seðlabankinn lækkað stýrivexti sína, um 0,25% og um 0,5%. Vaxtalækkanir í Evrópu hafa enn aukið þann mikla vaxtamun sem þegar er til staðar milli Íslands og helstu viðskiptalanda. Stýrirvextir hérlendis eru meðal þeirra hæstu í Evrópu, en verðbólga er nú með því lægsta sem gerist í álfunni.

 

Væru ennþá hærri hér ef horft væri til skemmri tíma en 4 ára
Samkvæmt Seðlabanka Íslands eru raunstýrivextir nú um 2,75%. Nafnvextirnir eru 5,3% og er því miðað við 2,5% verðbólgu við útreikning raunvaxtanna. Seðlabankinn hefur einnig reiknað raunvexti sína á grundvelli fjögurra ára verðbólguálags ríkisbréfa. Sé miðað við verðbólguálag til skemmri tíma eru raunstýrivextir hins vegar nokkuð hærri. Miðað við þriggja ára verðbólguálag eru raunstýrivextir 3,0%, og 3,1% ef miðað er við tveggja ára verðbólguálag. Raunstýrivextir eru enn hærri ef miðað er við skammtíma verðbólguvæntingar. Miðað við 12 mánaða verðbólguálag eru raunstýrirvextirnir enn hærri eða 3,9%. Sjá meðfylgjandi töflu.

 

 

Verðbólguálag

Raunstýrivextir

Verðbólgumarkmið

2,5%

2,75%

Verðbólguspá ársins

2,1%

3,1%

Verðbólguálag til 1 árs

1,3%

3,9%

Verðbólguálag til 2 ára

2,1%

3,0%

Verðbólguálag til 3 ára

2,2%

3,1%

Verðbólguálag til 4 ára

2,6%

2,6%

 

Raunstýrivextir hærri hérlendis
Verðbólguvæntingarnar eru talsvert meiri til lengri tíma en skemmri. Þrátt fyrir að miðað sé við fjögurra ára verðbólguálag ríkisbréfa, líkt og Seðlabankinn hefur gert, eru raunstýrivextir mun hærri hérlendis en í viðskiptalöndunum. Þeir eru um 2,6% hérlendis, en um 2,2% í Svíþjóð, 2,3% í Noregi, 1,8% í Bretlandi og 1,2% á evrusvæðinu.