Ný handbók stjórnarmanna komin út

Önnur útgáfa Handbókar stjórnarmanna er komin út. KMPG gefur út bókina sem er unnin í samstarfi við Samtök fjármálafyrirtækja, Landssamtök lífeyrissjóða, NASDAQ OMX Iceland hf., Samtök atvinnulífsins og Viðskiptaráð Íslands. Í nýju útgáfunni er t.d. ítarlegri umfjöllun um áhættustjórnun, stefnumótun og sviðsmyndir, árangursmat stjórnar, rafrænar stjórnarvefgáttir, aðgerðir í kjölfar hluthafafunda og hvernig haga eigi skattlagningu þóknunar fyrir stjórnarstörf.

 

Bókin kom fyrst út fyrir þremur árum og fékk mjög góðar viðtökur. Markmiðið með útgáfunni var að taka saman á einn stað yfirlit yfir hlutverk, ábyrgð og skyldur stjórnarmanna. Að sögn KPMG hefur reynslan sýnt að handbókin nýtist bæði þeim sem eru að taka sín fyrstu skref sem stjórnarmenn og þeim sem hafa mikla reynslu af stjórnarstörfum.

 

Í frétt KPMG segir að mikil  vitundavakning hafi orðið meðal stjórnarmanna um mikilvægi samfélagsábyrgðar og því hafi verið leitað til Festu, miðstöðvar um samfélagsábyrgð fyrirtækja, til að skrifa kafla í handbókina um samfélagsábyrgð. Þá fjalli Ketill Berg Magnússon, lektor við Háskólann í Reykjavík, sérstakalega um viðskiptasiðferði.

 

Nýja útgáfan tekur mið af leiðbeiningum um stjórnarhætti fyrirtækja sem Viðskiptaráð Íslands, NASDAQ OMX Iceland hf. og Samtök atvinnulífsins gáfu út árið 2012. Jafnframt tekur bókin mið af nýjum kauphallarreglum eftir því sem við á.

 

Frekari upplýsingar um Handbók stjórnarmanna má finna hér á vef KPMG.