LÍÚ: Hagsmunir Íslands best tryggðir utan ESB

Landssamband íslenskra útvegsmanna ítrekar að afstaða samtakanna til aðildar að ESB hefur ekki breyst. Samtökin hafa lýst því yfir að þau telji að hagsmunir Íslands séu best tryggðir utan ESB.  Af því leiðir að Landssamband íslenskra útvegsmanna styður ekki aðildarviðræður við ESB og er því ekki þeirrar skoðunar að æskilegt sé að aðildarviðræðum verði lokið eins og fram kemur í erindi Samtaka atvinnulífsins, Alþýðusambands Íslands og Viðskiptaráðs Íslands til forsætisráðherra.

 

Þetta kemur fram á vef LÍÚ þar sem segir að tilefnið sé bréf SA, ASÍ og VÍ til forsætisráðherra  dagsett 24. september 2013 þar sem tilkynnt var að samtökin hafi ákveðið að standa fyrir úttekt á aðildarviðræðum við Evrópusambandið, þróun ESB og valkostum í efnahagsmálum. Jafnframt komi fram að samtökin telji öll æskilegt að aðildarviðræðum verði lokið og að besti fáanlegi samningur um aðild verði borinn upp í þjóðaratkvæðagreiðslu. Eins og fram kemur hér að ofan er LÍÚ því ekki sammála.