Leikskólinn Sjáland tilnefndur til Menntaverðlauna atvinnulífsins 2014

Menntaverðlaun atvinnulífsins verða veitt í fyrsta sinn mánudaginn 3. mars á Hilton Reykjavík Nordica til fyrirtækja sem hafa staðið sig vel á sviði fræðslu- og menntamála. Leikskólinn Sjáland er eitt fjögurra fyrirtækja sem eru tilnefnd sem Menntasproti ársins 2014. Á vef SA geturðu nú séð hvers vegna í stuttu sjónvarpsinnslagi.

 

 

Önnur fyrirtæki sem eru tilnefnd sem Menntasprotar ársins eru Codland , Landsnet og Nordic Visitor.

 

Tilnefnd fyrirtæki hafa öll í rekstri sínum lagt aukna áherslu á fræðslu- og menntamál. Við mat á tilnefningum var skoðað hvort farnar hafi verið nýjar leiðir við eflingu menntunar innan fyrirtækjanna og þátttöku starfsmanna í fræðslustarfinu.

 

Ragnheiður Elín Árnadóttir, iðnaðar- og viðskiptaráðherra, mun tilkynna um úrslit á Menntadegi atvinnulífsins en dagskrá ráðstefnunnar má nálgast hér.

 

Í dómnefnd sátu Hildur Elín Vignir, framkvæmdastjóri IÐUNAR - fræðsluseturs, Steinn Logi Björnsson stjórnarformaður Bláfugls, Þorsteinn Ingi Sigfússon, forstjóri Nýsköpunarmiðstöðvar Íslands og Ingibjörg Elsa Guðmundsdóttir, framkvæmdastjóri Fræðslumiðstöðvar atvinnulífsins.

 

SA, SI, SAF, SVÞ, SF, SFF og Samorka efna til menntadagsins sem stendur frá kl. 13-16.30 á Nordica á mánudaginn. Menntun og fræðsla sem nýtist öllu atvinnulífinu verður þar í kastljósinu en þetta er í fyrsta sinn sem fulltrúar ólíkra atvinnugreina halda sameiginlegan menntadag.

 

Allir eru velkomnir og er ekkert þátttökugjald.

 

SMELLTU HÉR TIL AÐ SKRÁ ÞIG

Lógó - öll