Landsvirkjun undirritar sáttmála S.Þ. um samfélagsábyrgð

Landsvirkjun hefur undirritað UN Global Compact, sáttmála Sameinuðu þjóðanna um samfélagsábyrgð. Fyrirtækið bætist þar með í hóp yfir 10.000 fyrirtækja og stofnana í 130 löndum sem hafa skrifað undir sáttmálann en Samtök atvinnulífsins eru tengiliður við Global Compact á Íslandi. Með undirskriftinni skuldbindur Landsvirkjun sig til að virða og innleiða tíu reglur um mannréttindi, vinnurétt, umhverfismál og varnir gegn spillingu.


Fjallað er um málið í frétt á vef Landsvirkjunar, en þar segir m.a. að aðild Landsvirkjunar að Global Compact sé eðlilegt framhald af innleiðingu á stefnu um samfélagsábyrgð sem fyrirtækið hafi unnið að undanfarin ár:

 

„Landsvirkjun hefur frá stofnun lagt mikla áherslu á samfélagslega ábyrgð fyrirtækisins. Með undirritun Global Compact tökum við enn eitt skrefið og vonumst til þess að aðildin styðji okkur í því að gera áherslur og aðgerðir okkar enn sýnilegri og markvissari," segir Hörður Arnarson forstjóri Landsvirkjunar.

 

Með undirritun Global Compact skuldbindur Landsvirkjun sig til að skila árlegri samantekt um framvindu og árangur á sviði samfélagsábyrgðar. „Slíkt yfirlit auðveldar hagsmunaaðilum Landsvirkjunar að fylgjast með og hafa áhrif á þær áherslur sem fyrirækið setur sér og þann árangur sem það nær á sviði samfélagsábyrgðar," segir Ragna Sara Jónsdóttir forstöðumaður samfélagsábyrgðar hjá Landsvirkjun.

 

Landsvirkjun setti sér stefnu um samfélagsábyrgð á haustdögum 2011 og hefur síðan unnið að innleiðingu og framkvæmd stefnunnar í fyrirtækinu. Með stefnunni hefur Landsvirkjun einsett sér að starfa eftir ábyrgum stjórnarháttum, vinna með ábyrgum viðskiptavinum og birgjum, leggja áherslu á sjálfbæra nýtingu náttúruauðlinda, eiga gott samstarf við samfélagið, stuðla að heilbrigði og öryggi starfsfólks og vinna markvisst að miðlun þekkingar og nýsköpun."

 

Tengt efni:

 

Vefur Landsvirkjunar

 

Vefur Global Compact

 

Norrænt net Global Compact

 

10 viðmið Global Compact