Lækkun stýrivaxta í 9% lítið skref í rétta átt

Seðlabanki Íslands tilkynnti í dag um lækkun stýrivaxta um hálft prósentustig í 9,0%. Fréttastofa RÚV leitaði viðbragða hjá Vilhjálmi Egilssyni, framkvæmdastjóra SA: „Þetta er lítið skref í rétta átt en betur má ef duga skal." Vilhjálmur segir fjármagnskostnað íslenskra fyrirtækja allt of háan. Fjárfestingar þeirra séu í algjöru lágmarki en með því að koma þeim af stað sé hægt að koma Íslandi út úr kreppunni og auka atvinnu í landinu.

 

Vilhjálmur segir engan tilgang í því að halda vaxtamuninum milli Íslands og evrusvæðisins meiri en 3% og jafnvel þurfi enginn vaxtamunur að vera. Enginn eftirspurnarþrýstingur sé á verðlag; verðbólgan sé vegna annarra hluta. Því þurfi stýrivextir ekki að vera háir vegna verðbólgunnar.

 

Í samtali við mbl.is segir Vilhjálmur ennfremur algjört grundvallaratriði að afnema verði gjaldeyrishöftin. Fyrr hækki ekki gengi krónunnar. Í frétt mbl.is segir:

 

„ Ég vek líka athygli á því að þar sem bankar eru að endurskoða vaxtaálag á fyrirtæki þá eru vextir að hækka. Þannig að fjármagnskostnaður fyrirtækja er að hækka. Þannig að það þarf verulegar vaxtalækkanir frá Seðlabankanum til þess að vega á móti þessu," segir Vilhjálmur.

 

Hann segist ekki sjá nein einustu rök fyrir því að vaxtamunur á milli Íslands og evrusvæðisins sé yfir 3%. Öll verðbólga sem við búum við í dag stafar af lágu gengi, segir Vilhjálmur og segir skattahækkanir draga úr einkaneyslu.

 

Vilhjálmur segir að gengi krónunnar verði lágt eins og það er núna svo lengi sem gjaldeyrishöftin eru við lýði. Hann segir að það muni ekki gerast að gengið muni hækka og verða eðlilegt bara upp úr þurru.

 

Aðspurður um þau ummæli Más Guðmundssonar, seðlabankastjóra um þá skoðun sína að það ætti að skoða það gaumgæfilega að taka myndarleg skref varðandi afnám gjaldeyrishafta frekar en stærri skref varðandi lækkun vaxta, segir Vilhjálmur að hann sjái ekki hvernig annað útiloki hitt. Hins vegar verði ekki eðlilegur gjaldeyrismarkaður hér á landi fyrr en gjaldeyrishöftin verði afnumin. Þá fyrst geti gengi krónunnar hækkað í eitthvað eðlilegt horf og eðlilegt flæði gjaldeyris inn og út úr landinu.

 

Vilhjálmur segir að hann telji að setning gjaldeyrishaftanna í upphafi verið mistök og ef þau hefðu ekki verið sett þá væri gengi krónunnar hærra en það er í dag.

 

Sjá nánar:

 

Hlusta á umfjöllun fréttastofu RÚV

 

Yfirlýsing peningastefnunefndar Seðlabanka Íslands

 

Frétt mbl.is