Jákvæðar fréttir: Hafa keypt verkfræðiþjónustu fyrir 11 þúsund milljónir frá 2009

Rio Tinto Alcan á Íslandi, sem framleiðir hágæðaál í álverinu í Straumsvík, hefur á tæpum fjórum árum, þ.e. frá árinu 2009 til dagsins í dag, keypt þjónustu af íslenskum verkfræðistofum fyrir um 11 þúsund milljónir króna.

 

Þetta eru sannarlega jákvæðar fréttir en til að setja þessa tölu í samhengi má nefna að hún er ívið hærri en framlag ríkisins til Háskóla Íslands árið 2011 (9,9 milljarðar) og sambærileg öllum útgjöldum ríkisins til löggæslu sama ár (11,5 milljarðar).

 

Þyngst vegur hönnunarvinna og verkumsjón með 60 milljarða króna fjárfestingarverkefni í Straumsvík, sem hefur að miklu leyti verið í höndum íslenskra verkfræðinga. Álverið í Straumsvík kaupir vörur og þjónustu af hundruðum íslenskra fyrirtækja. Alla jafna nema þau viðskipti 5-7 milljörðum króna á ári, fyrir utan rafmagn.

 

Fjárhæðin er birt opinberlega í árlegri sjálfbærniskýrslu fyrirtækisins, sem send er helstu hagsmunaaðilum og birt á vefnum. Eftir að fjárfestingarverkefnið fór á fullan skrið hækkaði þessi fjárhæð umtalsvert og nam 14,3 milljörðum árið 2011. Rétt er að minna á að allar tekjur álversins koma erlendis frá. Hér er því um að ræða hreina innspýtingu á erlendum gjaldeyri í íslenskt efnahagslíf. 

 

Samtök atvinnulífsins þakka Rio Tinto Alcan á Íslandi fyrir fréttina en SA hvetja fólk úr atvinnulífinu til að senda okkur fleiri jákvæðar fréttir. Við viljum miðla því sem vel er gert og getur orðið fólki hvatning. Við munum birta fleiri jákvæðar fréttir á mánudaginn.

 

Pósthólfið er opið ...