Jákvæðar fréttir: Grænt malbik spratt upp úr kreppunni

Malbikunarstöðin Hlaðbær Colas hefur snúið vörn í sókn. Rúmlega fjögur ár eru liðin frá bankahruni og hafa verktakar barist í bökkum síðan. Algjört hrun varð á verkefnaframboði og slegist hefur verið um hvern bita. Hlaðbær Colas hefur ekki farið varhluta af ástandinu en í jákvæðri frétt frá fyrirtækinu kemur fram að stjórnendur tóku strax þann pólinn í hæðina að efla vöruþróun og nýsköpun á erfiðum tímum.

 

Þannig hefur Malbikunarstöðin Hlaðbær Colas nýtt tímann vel með vöruþróun á malbiki, bæði með áherslu nýjar og ódýrari vörur en einnig endingarbetra malbik. Fyrirtækið hefur á síðastliðnum tveimur árum fengið úthlutað rannsóknarstyrkjum frá Vegagerðinni, nú síðast vegna verkefnis sem byggir á 100% endurnýtingu gamals malbiks í ný slitlög - og leggur nú grænt malbik.  

 

Í frétt frá Hlaðbæ Colas sem fyrirtækið sendi í pósthólf SA fyrir jákvæðar fréttir segir að Hlaðbær Colas horfi æ meira til umhverfisþátta og endurnýtingar hráefna og vilji þannig leggja sitt af mörkum til verndunar náttúru, umhverfis og auðlinda. Um græna malbikið er þetta að segja:

 

„Verkefnið var unnið í samstarfi við bæði innlenda og erlenda aðila og er afraksturinn sá að fyrirtækið getur nú boðið upp á 100% endurunnið malbik sem er bæði hagkvæmt og lofar góðu varðandi endingu. Hefur efnið þegar verið lagt út á Krýsuvíkurveg við Seltún og á ýmsa göngustíga fyrir Grindavíkurbæ. Verkefnið var kynnt á rannsóknarráðstefnu Vegagerðarinnar nú í nóvember.

 

Bæjarfélagið er ekki síst ánægt með að geta nýtt 100% endurunnið hráefni og lagt þannig „Grænt malbik" á stíga bæjarins. Grindavík leggur mikið upp úr endurvinnslu og verndun náttúru. Gangandi og hlaupandi vegfarendur hafa verið mjög ánægðir með nýju göngustígana og hefur verið rætt um að þeir séu mýkri undir fót en hefðbundið malbik og dempa meira þau högg sem leiða upp í líkamann við göngu eða hlaup.

 

„100% endurunnið kaldblandað malbik" er aðeins eitt af þeim fjölmörgu nýsköpunar og þróunarverkefnum sem fyrirtækið hefur unnið að á undanförnum árum. Auk þess má nefna tilraunir með endurvinnslu og nýtingu á öðrum hráefnum í malbik og verkefni um sérstaklega endingargott malbik eða svokallaða PMA malbik. Það verkefni fékk úthlutað styrk úr rannsóknarsjóði Vegagerðarinnar árið 2011 og var malbikið meðal annars lagt á Bústaðaveginn í Reykjavík sumarið 2011 og á Reykjanesbraut 2012. PMA malbik hefur mikinn styrk og ákveðna teygjueiginleika sem eykur endingu malbiks og spornar við hjólfaramyndun.

 

Fyrirtækið vinnur nú að frekari þróun og verða spennandi nýjungar settar á markað á næsta ári. Fyrir veghaldara er hagkvæmni og umhverfisvernd þau megin sjónarmið sem líta ber til á næstu árum þegar bættur hagur leiðir til þess að auknu fé verður varið til viðhalds og nýbyggingar vega."

 

Samtök atvinnulífsins þakka Hlaðbæ Colas fyrir fréttina en SA hvetja fólk úr atvinnulífinu til að senda okkur fleiri jákvæðar fréttir. Við viljum miðla því sem vel er gert og getur orðið fólki hvatning. Við munum birta fleiri jákvæðar fréttir á næstu dögum.

 

Pósthólfið er opið ...