Ísland færist ofar í samkeppnismati

Ísland er í 16. sæti á lista yfir 75 ríki þar sem lagt er mat á samkeppnishæfni þeirra, en var í 23. sæti í fyrra (sjá töflu hér að neðan). Listinn er byggður á úttekt Alþjóða efnahagsstofnunarinnar (The World Economic Forum) í Davos í Sviss, í samvinnu við Harvard-háskóla. Þróun ýmissa efnahagsstærða er metin samhliða huglægu mati stjórnenda fyrirtækja. Meðal þeirra sem eru ofar Íslandi í samanburðinum eru hin Norðurlöndin, Bandaríkin, Bretland, Írland og Holland. Samtök atvinnulífsins hafa aðstoðað við öflun gagna í skýrsluna fyrir Ísland.

 

Tveir kvarðar
Síðustu tvö árin hefur skýrslan reyndar mælt samkeppnishæfni samkvæmt tveimur kvörðum. Annars vegar þeim hefðbundna sem mælir hagvaxtarhorfur fyrir næstu fimm árin (Growth Competitiveness Ranking). Þar er Ísland sem fyrr segir í 16. sæti en var í því 23. í fyrra, líkt og sjá má á töflunni hér fyrir neðan. Hinn kvarðinn sem kynntur var til sögunnar í fyrra mælir samkeppnishæfni fyrst og fremst út frá grundvelli verðmætasköpunar, sem einkum snýr að núverandi nýtingu hagkerfisins á fjármagni, vinnuafli og náttúruauðlindum (Current Competitiveness Index Ranking). Þar mælist Ísland einnig í 16. sæti, og hefur hækkað um eitt sæti frá fyrra ári, úr því 17. Á báðum kvörðum er Finnland í efsta sæti og Bandaríkin í öðru.

 

Styrkur og veikleiki Íslands
Niðurstöðurnar fyrir Ísland eru breytilegar, en víðast hvar er Ísland þó að hækka í samanburðinum. Þannig er Ísland í fremsta flokki hvað varðar hagnýtingu upplýsingatækni og skilvirkni stjórnsýslu, en í 34. sæti þegar horft er til efnahagslegs umhverfis almennt (svo sem efnahagslegs stöðugleika og hlutfalls opinberra útgjalda af vergri landsframleiðslu) og í 67. sæti hvað snertir þjóðhagslegan sparnað. Ísland er ásamt Noregi og Írlandi sérstaklega nefnt sem dæmi um land þar sem efnahagsumsvifin eru meiri en hagkerfið standi undir til lengdar, og þar sem erfitt geti reynst að viðhalda núverandi árangri. Loks hefur Ísland bæst í hóp þeirra ríkja þar sem flest ný einkaleyfi eru skráð á ári miðað við fjölda íbúa, ásamt með Írlandi, Hong Kong, Kóreu, Singapore og Taiwan.

 

Fleiri ríki í ár
Í ár tekur skýrslan til 75 ríkja, en 17 ríki bættust í hópinn frá fyrra ári. Eistland er hæst þeirra á listanum yfir samkeppnishæfni, í 29. sæti, og því hafa þau ekki áhrif á samanburð á stöðu Íslands milli ára.

 

 

Samkeppnishæfni ríkja

(mat á forsendum framtíðarhagvaxtar)
 

  2001 2000
Finnland 1 5
Bandaríkin 2 1
Kanada 3 6
Singapore 4 2
Ástralía 5 11
Noregur 6 15
Taiwan 7 10
Holland 8 3
Svíþjóð 9 12
Nýja Sjáland 10 19
Írland 11 4
Bretland 12 8
Hong Kong 13 7
Danmörk 14 13
Sviss 15 9
ÍSLAND 16 23
Þýskaland 17 14
Austurríki 18 17
Belgía 19 16
Frakkland 20 21
Japan 21 20
Spánn 22 26
Kórea 23 28
Ísrael 24 18
Portúgal 25 22
Ítalía 26 29
Chile 27 27
Ungverjaland 28 25
Eistland 29 nýtt inn
Malasía 30 24
Slóvenía 31 nýtt inn
Mauritus 32 35
Tæland 33 30
Suður-Afríka 34 32
Costa Rica 35 37
Grikkland 36 33
Tékkland 37 31
Trinidad og Tobago 38 nýtt inn
Kína 39 40
Slóvakía 40 38
Pólland 41 34
Mexíkó 42 42
Litháen 43 nýtt inn
Brasilía 44 45
Jórdanía 45 46
Uruguay 46 nýtt inn
Lettland 47 nýtt inn
Filippseyjar 48 36
Argentína 49 44
Dóminíska lýðveldið 50 nýtt inn
Egyptaland 51 41
Jamaica 52 nýtt inn
Panama 53 nýtt inn
Tyrkland 54 39
Perú 55 47
Rúmenía 56 nýtt inn
Indland 57 48
El Salvador 58 49
Búlgaría 59 57
Víetnam 60 52
Sri Lanka 61 nýtt inn
Venesúela 62 53
Rússland 63 54
Indónesía 64 43
Kólombía 65 51
Guatemala 66 nýtt inn
Bólivía 67 50
Ekvador 68 58
Úkraína 69 56
Hondúras 70 nýtt inn
Bangladesh 71 nýtt inn
Paraguay 72 nýtt inn
Nicaragua 73 nýtt inn
Nígería 74 nýtt inn
Zimbabwe 75 55