Framkvæmdastjóri ÍSTAKS: Dýrkeypt að gera ekki neitt

Kolbeinn Kolbeinsson, framkvæmdastjóri ÍSTAKS, var á meðal frummælenda á opnum fundi SA um atvinnumál sem fram fór fyrr í dag. Kolbeinn sagði tekjur fyrirtækisins hér á landi hafi dregist mikið saman undanfarin ár og það væri til marks um erfiða stöðu á innanlandsmarkaði að það hafi ekki verið fyrr en í september sem fyrsti nýi innlendi verksamningur árins hafi verið undirritaður. ÍSTAK hefur brugðist við samdrættinum með því að leita verkefna á erlendum mörkuðum en Kolbeinn segir mikilvægt að hefja uppbyggingu innanlands og snúa þróuninni við. Atvinnuleysi sé að festast í sessi sem afleiðing af „það er öruggast að gera ekki neitt" stefnunni sem sé dýrkeypt.

 

Kolbeinn sagði í þjóðhagsspá treyst á að fjárfestingar atvinnuveganna muni sjá til þess að hagvöxtur fari vaxandi. Aðstæður séu hins vegar erfiðar, mjög háir vextir á Íslandi hamli fjárfestingu og vegna gjaldeyrishafta vilji útlendingar ekki koma með fé til landsins í fangið á óútreiknanlegu ríkisvaldi. Þá sé ekki raunverulegur vilji til þess að hleypa erlendu fé inn í landið og hindranir lagðar fyrir þá sem vilji koma hingað.

Kolbeinn Kolbeinsson.

En hvað er þá til ráða? Kolbeinn lagði til að Íslendingar spyrji hvernig leysa megi úrlausnarefni í stað þess hvort hægt sé að leysa þau. Einnig að mörkuð verði skýr, jákvæð og metnaðarfull stefna um nýtingu  auðlinda landsins - í stað stefnu um að öruggast sé alltaf að gera ekki neitt. Spyrja eigi að því hvernig auðlindir okkar séu nýttar en ekki hvort. Þá eigi Íslendingar að vera í fararbroddi í kröfum til umhverfismála.

 

Um nauðynlega erlenda fjárfestingu á Íslandi sagði Kolbeinn:

 

„Við eigum aðeins að laða til okkur erlenda fjárfesta sem deila okkar metnaðarfullu framtíðarsýn og vilja virkja kraftinn í okkur og í landinu okkar - með okkur. Til að tryggja þjóðarsátt um verkefnið, þá eigum við að koma okkur upp „olíusjóði", til dæmis að fyrirmynd Norðmanna, þar sem tekjur þjóðarinnar af auðlindum hennar renna í sameiginlegan sjóð hennar."

 

Tengt efni:

 

Glærur Kolbeins (Power Point)