Fræðslufundur í dag um umboðsmann skuldabréfaeigenda

Samtök fjármálafyrirtækja (SFF) boða til kynningarfundar í dag, mánudaginn 2. maí um umboðsmann skuldabréfaeigenda með áherslu á fyrirkomulagið í Noregi (Norsk Tillitsmann). Fundurinn fer fram á Hilton Reykjavík Nordica, Suðurlandsbraut 2, fundarsal G kl. 15 - 16.

 

Markaður fyrir fyrirtækjaskuldabréf hér á landi tók dýfu eftir efnahagshrunið í október 2008.  Skuldabréfamarkaðurinn er þrátt fyrir það líflegur, þótt enn sé úrval bréfa tiltölulega einhæft. Ekki er ástæða til að ætla annað en að það muni breytast smám saman þegar efnahagslífið réttir úr kútnum, fjármálafyrirtæki sækja í auknum mæli fjármagn á skuldabréfamarkað og rekstur atvinnufyrirtækja braggast.

 

Öflugur skuldabréfamarkaður getur leikið stórt hluverk við endurreisn íslensks atvinnulífs og því er mikilvægt að efla traust milli útgefenda og fjárfesta til að auka tiltrú á markaði. Ætla verður að í framtíðinni muni fagfjárfestar gera kröfur um að skilmálar skuldabréfa verði strangari en almennt tíðkaðist fyrir efnahagshrunið. Á sama tíma þarf að tryggja að slíkir skilmálar innihaldi nægilegan sveigjanleika fyrir útgefendur þannig að þeir geti lagað sig að aðstæðum í efnahagslífinu hverju sinni.

 

SFF settu á síðasta ári á stofn sérstakan verðbréfahóp sem skilaði þann 20. janúar 2011 af sér skýrslu með tillögum til úrbóta á ýmsu er snýr að verðbréfamarkaðnum. Ein af þeim tillögum hópsins sem stjórn SFF hefur forgangsraðað er að skoða möguleikann á að koma upp umboðsmanni skuldabréfa hér á landi til að  að auka skilvirkni og traust á skuldabréfamarkaðinum.  Fundinum í dag er ætlað að gefa þeim hérlendu aðilum sem málið varðar innsýn í norska fyrirkomulagið og leggja þannig grunn að næstu skrefum.

 

Fundurinn er sniðinn fyrir fjárfesta, útgefendur og fjármálafyrirtæki sem eru milligönguaðilar á skuldabréfamarkaði.

 

Vinsamlega tilkynnið skráningu á fundinn í síma 591-0400 eða á netfangið sff@sff.is.

 

Dagskrá:
 

15:00 - 15:25     Þróun skuldabréfamarkaðar Í Noregi og hlutverk umboðsmanns skuldabréfaeigenda, Finn Myhre, lögmaður og fyrrverandi stjórnarformaður Norsk Tillitsmann


15:25 - 15:45      Norski skuldabréfamarkaðurinn í dag, Ragnar Sjoner, framkvæmdastjóri Norsk Tillitsmann


15:45 -16:30      Umræður

 

Fundarstjóri:     Yngvi Örn Kristinsson, hagfræðingur

 

Norsk Tillitsmann er félag sem var stofnað 1993 í kjölfar bankakreppunnar í Noregi. Á þeim tíma var talið nauðsynlegt að setja á laggirnar óháðan aðila til að gæta hagsmuna kröfuhafa gagnvart lántökum á norskum skuldabréfamarkaði til að auka tiltrú fjárfesta. Norsk Tillitsmann er í eigu helstu þátttakenda á norskum skuldabréfamarkaði svo sem banka, líftryggingarfélaga, verðbréfafyrirtækja og stofnanafjárfesta. Í flestum skuldabréfaútgáfum í Noregi er tilnefndur umboðsmaður skuldabréfaeigenda. Sjá nánar /www.trustee.no