Evrópskt viðskiptaþing 6.-8. júní

Dagana 6.-8. júní verður haldið eins konar evrópskt viðskiptaþing, European Business Summit, í Brussel. Boðið er upp á fjölda kynninga og fyrirlestra, t.d. á viðskiptaumhverfi væntanlegra aðildarríkja ESB, um orkumál, rafræn viðskipti, frjálst flæði fólks, símenntun o.fl. Þá er þetta vettvangur þar sem forsvarsmenn fyrirtækja eiga viðræður við embættis- og stjórnmálamenn ESB og aðildarríkja þess, auk hagsmunasamtaka. Meðal þátttakenda af hálfu ESB verða framkvæmdastjórnar-mennirnir Pascal Lamy og Günter Verheugen, og Pat Cox, forseti Evrópuþingsins. Að þinginu standa UNICE, Evrópusamtök atvinnulífsins, og FEB, belgísku samtök atvinnulífsins, með stuðningi framkvæmdastjórnar ESB. Þátttökugjald er um kr. 175.000 (1.995 evrur) sé það greitt fyrir 30. apríl, ella um kr. 191.000 (2.178 evrur). Sjá nánari upplýsingar á síðu European Business Summit.