Ekki varanleg hækkun á vísitölu neysluverðs

Vísitala neysluverðs hækkaði um 0,82% milli apríl og maí, samkvæmt mælingu Hagstofu Íslands. Vísitala neysluverðs án húsnæðis hækkaði um 0,66%. Í samtali við Morgunblaðið segir Hannes G. Sigurðsson, aðstoðarframkvæmdastjóri Samtaka atvinnulífsins, að hækkun vísitölunnar hafi komið SA mjög á óvart. Hann segist ekki telja að um sé að ræða varanlega hækkun verðbólgunnar. Svo sé að sjá sem margir sérstakir liðir komi saman að þessu sinni, sem leiði til þessa verðbólguskots. Ekki hafi dregið úr hækkunum á fasteignamarkaði, sem rekja megi annars vegar til væntanlegra breytinga á hinu opinbera húsnæðislánakerfi, og hins vegar til vaxtalækkana. Þá hafi einnig áhrif að gengi krónunnar hafi verið að síga. „Hækkun vísitölunnar er að hluta til áhyggjuefni en að hluta til markast þetta af röð tilviljana,“ segir Hannes.