Ekki miklar undirliggjandi verðlagsbreytingar

Vísitala neysluverðs hækkaði um 0,04% milli mars og apríl samkvæmt mælingum Hagstofunnar. Hún er nú 221,9 stig, en „rauða strikið“ svokallaða eru 222,5 stig í maí. Samkvæmt því má vísitalan ekki hækka um meira en 0,27% um næstu mánaðamót til þess að verðlagsmarkmiðið náist.

 

Undirliggjandi verðlagsbreytingar ekki miklar
Í samtali við Fréttavef Morgunblaðsins segir Ari Edwald, framkvæmdastjóri Samtaka atvinnulífsins, það vera fagnaðarefni að neysluvísitalan skuli hafa staðið nánast í stað milli mánaða. Hann segir líkurnar nú meiri á því að markmiðið fyrir maí komi til með að nást, þótt of snemmt sé að slá því föstu. „Þessi nýja mæling staðfestir heilt yfir að undirliggjandi verðlagsbreytingar séu ekki miklar,“ segir Ari. Hann segir að ýmsir þættir í efnahagslífinu hafi verið að leita jafnvægis að undanförnu og skilyrði fyrir vaxandi verðbólgu séu ekki lengur fyrir hendi.

 

Sjá fréttatilkynningu Hagstofu Íslands.

 

Sjá frétt Mbl.is.