Ályktun Iðnþings 2011

„Vinnumarkaðurinn er í misvægi. Á sama tíma og djúp kreppa ríkir í tilteknum atvinnu-greinum skortir vinnuafl í öðrum, einkum tæknimenntað fólk. Um 14 þúsund manns eru án atvinnu með tilheyrandi samfélagslegum kostnaði. Markvisst átak þarf til langs tíma til að rétta af þennan halla, í samstarfi atvinnulífs, menntakerfis og stjórnvalda." Þetta segir m.a. í ályktun Iðnþings 2011 sem fram fór í gær. Í ályktuninni er ennfremur fjallað um tækifæri í klasasamstarfi, nauðsyn trúverðugrar stefnu í peningamálum og afnám gjaldeyrishafta auk mikilvægis þess að óvissu verði létt af atvinnulífinu.

 

Ítarlega er fjallað um Iðnþing 2011 á vef SI þar sem m.a. má horfa á upptöku af þinginu. Helgi Magnússon var endurkjörinn formaður samtakanna. Ályktun Iðnþings 2011 má lesa hér að neðan í heild:

 

Ályktun Iðnþings 2011

  • Átak í verk- og tæknimenntun
  • Sparnaður hins opinbera með klasasamstarfi
  • Trúverðug stefna í peningamálum og afnám gjaldeyrishafta
  • Óvissu létt af atvinnulífinu
  • Umsóknarferli að ESB verði lokið með faglegum hætti
  • Festu komið á skipan stjórnkerfis og löggjafar
  • Fjárfestingar og framkvæmdir     
  • Skattkerfið einfaldað á ný og skattprósentur lækkaðar

Vinnumarkaðurinn er í misvægi. Á sama tíma og djúp kreppa ríkir í tilteknum atvinnu-greinum skortir vinnuafl í öðrum, einkum tæknimenntað fólk. Um 14 þúsund manns eru án atvinnu með tilheyrandi samfélagslegum kostnaði. Markvisst átak þarf til langs tíma til að rétta af þennan halla, í samstarfi atvinnulífs, menntakerfis og stjórnvalda

 

Niðurskurður í rekstri hins opinbera er óhjákvæmilegur. Í því felst ekki bara ógnun heldur líka tækifæri til að endurskoða og bæta vinnubrögð og fjárveitingar. Nýta á klasasamstarf fyrirtækja, stofnana og menntakerfis til að þróa nýjar lausnir og vinnubrögð hjá hinu opinbera. Það sparar fé til langs tíma án þess að koma niður á þjónustu. Beina þarf opin-beru þróunarfé sem mest úr opinberum stofnanafarvegi í samkeppnisfyrirkomulag eins og Tækniþróunarsjóður rekur.

 

Frá árslokum 2008 hefur íslenska krónan verið bundin í víðtæk gjaldeyrishöft eftir að bankakerfið hrundi og peningastefnan beið skipbrot. Þótt erfiðar aðstæður kunna að hafa réttlætt höftin er skaðsemi þeirra slík að ekki verður til lengdar unað. Afnám hafta í áföngum er nauðsynlegt samhliða skýrri sýn til langs tíma í peningamálum atvinnulífinu til hagsbóta.

 

Í kjaramálum er atvinnuleiðin eini raunhæfi valkosturinn sem  byggist á langtímahugsun, samræmdri launastefnu, verðmætasköpun og fjárfestingu. Stórfelldar krónutöluhækkanir leiða aðeins til verðbólgu og kjararýrnunar.

 

Sótt hefur verið um aðild að ESB. Halda þarf umsóknarferlinu áfram af fullum heilindum í náinni samvinnu við atvinnulíf og aðra hagsmunaaðila þar sem litið er til víðtækra hags-muna heildarinnar en ekki bara þröngra sérhagsmuna.

 

Óskýrar yfirlýsingar stjórnvalda um þjóðnýtingu fyrirtækja og eignaupptöku eru afar skaðlegar. Erlendir og íslenskir fjárfestar verða að geta treyst því að hér sé réttarríki, að framkvæmdavaldið fari að lögum og reglum og því sé reynandi að taka þátt í íslenskri atvinnuuppbyggingu. Festa þarf að komast á skipan stjórnkerfis og löggjafar í landinu.

Fjárfestingar eru í sögulegu lágmarki á sama tíma og mikið fé liggur óhreyft í banka-kerfinu. Hraða þarf endurskipulagningu á fjárhag atvinnulífsins. Taka þarf ákvörðun um að hefja arðbærar framkvæmdir.

 

Vinda þarf ofan af skattahækkunum á síðastliðnum tveimur árum og greiða úr því stórflækta skattkerfi sem nú hefur verið komið á. Það hamlar fjárfestingu, tefur fyrir endurreisn atvinnulífsins en skilar litlu í ríkissjóð.