2,6% atvinnuleysi í nóvember

Í nóvembermánuði síðastliðnum voru skráðir 85.377 atvinnuleysisdagar á landinu öllu sem jafngilda því að 3.885 manns hafi að meðaltali verið á atvinnuleysisskrá í mánuðinum.  Þessar tölur jafngilda 2,6% af áætlun efnahagsskrifstofu fjármálaráðuneytis um mannafla á vinnumarkaði í nóvember 2004, en áætlaður mannafli á vinnumarkaði í nóvember 2004 er 148.557. Til samanburðar mældist atvinnuleysið 2,7% í október sl. en 3,0% í nóvember í fyrra.

 

Atvinnuleysið mældist í nóvember 2,9% á höfuðborgarsvæðinu og hafði minnkað frá fyrra mánuði, en 2,2% á landsbyggðinni og hafði það aukist frá fyrra mánuði. Mest mældist atvinnuleysið á Norðurlandi eystra, 3,1%, en minnst á Austurlandi, 1,2%. Á landinu öllu mældist atvinnuleysi 3,3% meðal kvenna en 2,1% meðal karla.

 

Eftirspurn eftir iðnmenntuðum

Að mati Vinnumálastofnunar er líklegt að atvinnuleysið breytist lítið í desember og verði á bilinu 2,6 – 2,9%. Þá kemur fram í skýrslu Vinnumálastofnunar að mikil eftirspurn sé eftir iðnmenntuðu fólki.

 

Sjá nánar á vef Vinnumálastofnunar.